“Əlilliyin qiymətləndirilməsi prosesi elektron qaydada həyata keçirilir və vətəndaş ekspert təması olmadan aparılır. Belə ki, vətəndaş ərazi üzrə yaşadığı səhiyyə müəssisəsinə müraciət edir”. 

Valyuta.az AzərTac-a istinadən xəbər verir ki, bunu Dövlət Tibbi Sosial Ekspertiza və Reabilitasiya Agentliyinin İdarə Heyətinin sədri Cavid Əbdül-Qədirov deyib.

Onun sözlərinə görə, səhiyyə müəssisəsində həkim-məsləhət komissiyası tərəfindən vətəndaşın sağlamlıq vəziyyəti qiymətləndirilir: 

“Sağlamlıq vəziyyətinin qiymətləndirilməsi dedikdə ambulator, stasionar, instrumental və digər mütəxəssislər tərəfindən müayinələrin həyata keçirilməsi nəzərdə tutulur. İlk mərhələdə müayinədən keçəndən və həkim-məsləhət komissiyasının qərarından sonra Forma 88 tərtib edilir və əlillik altsisteminə daxil edilir. Bundan sonra həkim-ekspert adsızlaşdırılmış qaydada vətəndaşın müayinəsini aparır və qərarını bildirir”. 

C.Əbdül-Qədirov bildirib ki, elektron qaydada qərar həm səhiyyə müəssisəsinə çatdırılır, həm də vətəndaşın formada qeyd etdiyi mobil və digər nömrələrinə bu barədə məlumat göndərilir.