"A-Qroup Sığorta" şirkətinin yığımları 2024-cü ilin ilk on bir ayında 17,04 milyon manat təşkil edib ki, bu da ötən ilin eyni dövrünə nisbətən 11,3% azdır. 

Valyuta.az bu barədə Azərbaycan Mərkəzi Bankına istinadən xəbər verir. Son bir ildə tibbi sığorta üzrə ixtisaslaşan sığorta şirkətinin yığımları 2,18 milyon manatdan çox azalıb. Belə ki, 2023-ci ilin ilk on bir ayında şirkət 19,22 milyon manat sığorta haqqı toplaya bilmişdi. 

"A-Qroup” yığımlarla yanaşı, sığorta ödənişlərini də azaltmağa başlayıb. 

Belə ki, şirkətin ödənişləri yanvar-noyabr aylarında 7,4% və ya 953 min manat civarında azalaraq 11,98 milyon manata enib. Ötən ilin eyni dövründə bu rəqəm 12,93 milyon manat təşkil edib. 

Şirkətin yığımlarında ödənişlərə nisbətən daha çox azalma onun zərərliyinə, yəni ödəniş-yığım nisbətinə mənfi təsir edib. “A Qroup”un zərərliliyi son bir ildə 67,3%-dən 70,3%-ə qədər yüksəlib.  

Xatırladaq ki, “A-Qroup Sığorta” 1995-ci ildə yaradılıb. Onun nizamnamə kapitalı 8 milyon manatdır. Səhmlərin 100%-i şirkətin Direktorlar Şurasının sədri Sabir Adna oğlu Adnayevə məxsusdur.

Pünhan