“İşğaldan azad edilmiş ərazilərə yerli və xarici investorların cəlb olunması üçün ilk növbədə təhlükəsizlik proqramı təmin olunmalıdır. Daha sonra sənaye məhəllələri formasında onların işlərini tənzimləyə biləcək şəhərcik salınmalıdır”.

Bunu Valyuta.az-a iqtisadçı Fuad İbrahimov işğaldan azad edilmiş ərazilərdə yüngül sənaye sahələrinin inkişafı haqqında danışarkən deyib.

İqtisadçı bildirib ki, həmin ərazilərdə iqtisadi inkişafı təmin etmək üçün şəhərciklərin salınması iki istiqamətdə müəyyənləşib:

“Ağdam və Şərqi Zəngəzur istiqamətində iqtisadi zonada iki sənaye parkının yaradılması ilə bağlı sərəncam verilib və artıq bünövrəsi qoyulub. Həmin ərazilərdə yerlərdə fəaliyyət göstərmək üçün isə investisiya cazibadarlığı var”. 

Fuad İbrahimov bildirib ki, burda digər bir məsələ isə infrasrukturla bağlıdır:

“Yol, nəqliyyat infrastrukturu olmalıdır və bununla bağlı da paralel işlər görülür. İstər Ağdam istiqamətindən Bərdə-Ağdam dəmir yolu, istərsə də Füzuli-Ağbənd dəmir yolu  və şaxələnmələri, avtomobil yolları, hətta hava nəqliyyatı üçün mühit var. Ona görə də bu formatda investisya cazibədarlığı yaradılacaq. O zonalarda müəyyən dövrdə biznesin formalaşması üçün  xüsusi olaraq vergi güzəştləri nəzərdə tutulub. Nəzəriyyə olaraq nə nəzərdə tutulubsa, hamısı tətbiq olunur”.

Həmsöhbətimiz qeyd edib ki, yerli sahibkarlar üçün də bu sahədə böyük güzəştlər var:

“İstər yerli sahibkar, istərsə də xarici investor orda fəaliyyət göstərsə, onlar yerli işçi qüvvədən istifadə edəcək. Yerli sahibkarlar böyük maliyyə yatırtmadan ev təsərrüfatı formasında yaratmaq istəyirsə bunun üçün də dövlət İqtisadiyyat Nazirliyi vasitəsi ilə bu sahələrə kredit ayrır. Sadəcə olaraq həmin sahibkarlar lazımi prosedurlardan keçməlidir”.

Davud