Ağdam Sənaye Parkında 4-5 müəssisənin inşası tezliklə yekunlaşdırılacaq.

Valyuta.az xəbər verir ki, bunu jurnalistlərə açıqlamasında İqtisadiyyat Nazirliyinin İqtisadi Zonaların İnkişafı Agentliyinin İdarə Heyətinin sədri Elşad Nuriyev deyib.

“Ağdam Sənaye Parkında 4-5 müəssisənin inşasının tezliklə yekunlaşdırılması planlaşdırılır. 2024-cü ilin əvvəlində onlardan bir neçəsinin fəaliyyətə başlayacağını gözləyirik”, - deyə o bildirib.

Nuriyevin sözlərinə görə, bunlar əsasən tikinti materialları, ayaqqabı və divar kağızı istehsal edəcək müəssisələrdir.

2021-ci il mayın 28-də Prezident İlham Əliyev “Ağdam Sənaye Parkının yaradılması haqqında” Fərman imzalayıb. Sənaye Parkının ərazisi 190 hektardır. Ağdam Sənaye Parkında 19 sahibkarlıq subyektinə rezidentlik, 6 sahibkarlıq subyektinə isə qeyri-rezidentlik statusu verilib. Rezidentlər tərəfindən Sənaye Parkına investisiyalar 176 milyon manat məbləğində qiymətləndirilir ki, bu da 1,7 mindən artıq daimi iş yerinin yaradılmasına imkan verəcək. (İnterfaks-Azərbaycan)