İqtisadiyyat naziri Mikayıl Cabbarov X (tvitter) hesabında yazıb ki, cari ilin 8 ayında qeyri-neft-qaz sektoru üzrə investisiya qoyuluşları ötən ilin müvafiq dövrünə nisbətən 17,1% artıb. Nazir qeyd edib ki, qeyri-neft-qaz sektoru üzrə investisiya qoyuluşları 7 milyard 98,8 milyon manata çatıb.

İqtisadçı ekspert Rəşad Hüseyn Valyuta.az-a açıqlamasında bildirib ki, sənaye parklarının genişlənməsi və yerli və xarici investisiya qoyuluşlarının artması qeyri-neft sektorunun inkişafına təkan verən əsas amillərdir:

“Keçən ilin analoji dövrü ilə müqayisədə bu ilin 8 ayı üzrə qeyri-neft sektoruna investisiya qoyuluşu üzrə 17 faizlik artımın baş verməsi bir sıra amillərlə bağlıdır. Son zamanlar ölkədə sənaye parklarının sahələri genişlənir. Artıq Qarabağ İqtisadi Zonasında da sənaye parkları yaradılıb. Yəni onlar da ölkə iqtisadiyyatının lokomotivinə qoşuldular. Digər tərəfdən, əvvəlki illərlə müqayisədə hazırda iqtisadi siyasət idxaldan asılı və ixrac istiqamətli sahələrinin genişləndirilməsi istiqamətində aparılır. Bir sözlə, ölkədə sənaye parklarının genişləndirilməsi və qeyri-neft sektoruna qoyulan yerli və xarici investisiyaların həcminin artması həmin sahəyə qoyulan investisiya həcminin də artmasına səbəb olub”.

Ramiz