Azərbaycan 2021-ci ilin yanvar-may aylarında dünya bazarlarına 2 min 420,26 kq qızıl ixrac edib ki, bu da ötən ilin müvafiq dövrü ilə müqayisədə 36,7% çoxdur. 

Valyuta.az İnterfax.az-a istinadən xəbər verir ki, hesabat dövründə ixrac olunmuş qızılın dəyəri $87 milyon 422,81 min (artım 35,1%) təşkil edib.

Cari ilin yanvar-may aylarında Azərbaycandan $1 milyon 61,04 min dəyərində (artım 2 dəfə) 1 min 383,33 kq gümüş (artım 48,2%) ixrac edilib.

Qızıl ixracının bütün həcmi və gümüş ixracının böyük hissəsi ($1 milyon 3,24 min dəyərində 1 min 213,33 kq) İsveçrənin payına düşüb. Az həcmdə gümüş ($57,8 min dəyərində 170 kq) isə Türkiyəyə ixrac edilib.

2020-ci ildə Azərbaycan $205 milyon 577,52 min dəyərində 4 min 435,97 kq qızıl ixrac edib.

Hazırda Azərbaycanda qızıl hasilatı iki şirkət tərəfindən həyata keçirilir. Azərbaycan 1997-ci il avqust ayının 21-də 6 yatağın işlənməsini nəzərdə tutan müqavilə imzalayıb. Müqavilədə Azərbaycanın payı 51%, “Anglo Asian Mining PLC” şirkətinin payı 49% təşkil edir. Müqaviləyə görə, bu yataqlardan 400 ton qızıl hasilatı planlaşdırılır.

İlk qızıl hasilatına 2009-cu ildə, gümüş hasilatına isə 2010-cu ildə “Gədəbəy” yatağından başlanılıb. “Qoşa” yatağından qızıl hasilatı 2013-cü ilin III rübündən həyata keçirilir. 2015-ci ilin yayında şirkət “Qədir” yatağından, 2017-ci ilin sentyabr ayından isə “Uğur” yatağından qızıl hasilatına başlayıb.

Bundan başqa, Prezident İlham Əliyevin 11 fevral 2015-ci il tarixli fərmanı ilə yaradılan “AzerGold” QSC tərəfindən də qızıl və gümüş hasilatı həyata keçirilir.

Cəmiyyət Qaradağ, Çovdar, Göydağ, Dağkəsəmən filiz sahələrinin, Köhnəmədən sahəsinin və Kürəkçay hövzəsi yataqlarının öyrənilməsi, tədqiqi, kəşfiyyatı, işlənməsi və idarə olunması ilə məşğul olur.