“Prezident İlham Əliyevin aprelin 20-də Hacıqabul Sənaye Məhəlləsində  açılışında iştirak etdiyi obyektlər rayonun gələcək iqtisadi potensialını böyük dərəcədə gücləndirəcək”.

Valyuta.az Trend.az-a istinadən xəbər verir ki, bunu Milli Məclisin deputatı Vüqar İskəndərov deyib.

Əvvəlcə Məhəllədə yerləşən “Azərmaş” zavodu barədə məlumat verən  deputat bildirib ki, zavod 1500 ədəd yük və xüsusi təyinatlı avtomobil istehsal etmək imkanına malikdir: 

“Müəssisə Hacıqabul rayonunda 100 nəfərdən çox insanın məşğulluğunu təmin edəcək. Zavodda Özbəkistan və Rusiya ilə birgə layihələr icra olunacaq. Müəssisənin istifadəyə verilməsi rayonun iqtisadi inkişafı üçün böyük təkan olmaqla yanaşı, ölkəmizdə avtomobil sənayesinin formalaşmasında mühüm rol oynayacaq”.

V.İsgəndərov, Hacıqabul Sənaye Məhəlləsində yaradılan müəssisələrdən birinin də “Elberg” tikinti materialları üçün avadanlıqlarının istehsalı zavodu olduğunu diqqətə çatdırıb:

“Bu müəssisə Azərbaycanda ilk təcrübədir. Müəssisə il ərzində iki zavodu “açar-təhvil” prinsipi ilə qurmaq imkanına malikdir. Fəaliyyətə başlaması ilə ölkədə istehsal avadanlıqları və qurğularına olan tələbatı qismən ödəməklə yanaşı, yeni ixrac imkanları da yaranacaq. “Uyusal Ambalaj” plastik su qabları istehsalı müəssisədə isə il ərzində müxtəlif ölçülü 350 min ədəd su qabı istehsal olunacaq. Azərbaycanda 15 ildir fəaliyyət göstərən şirkət artıq məhsullarını Hacıqabul Sənaye Məhəlləsində istehsal edəcək”.

O, Hacıqabul Sənaye Məhəlləsinin digər rezidenti olan “Plasstech” zavodunun ildə 600-900 ton yüngül tara istehsal etmək gücündə olduğunu da diqqətə çatdırıb. 

Millət vəkili qeyd edib ki, bu taralardan kənd təsərrüfatı məhsullarının daşınması və qablaşdırılması zamanı istifadə olunur. 

Vüqar İsgəndərov, sənaye məhəlləsində istifadəyə verilən müəssisələrdən birinin isə gübrə istehsalı ilə məşğul olan “AzAgromila” müəssisəsi olduğunu bildirib:

“Bu müəssisədə ildə 600 min ton gübrə istehsal olunacaq. Xüsusi olaraq vurğulamağı özümə borc bilirəm ki, müxtəlif sahələri əhatə edən bu müəssisələrin açılması, eyni zamanda aqroparkların fəaliyyətə başlaması dövlətin regionlara xüsusi diqqət və qayığısını bir daha ortaya qoyur. Yəni, qeyd olunduğu kimi əhali baxımından o qədər də böyük olmayan Hacıqabul rayonunda həm sənaye, həm kənd təsərrüfatı müasir üsullarla inkişaf edir, məhsuldarlıq yüksəlir, insanlar işlə təmin edilir. Beləliklə, dövlətin gördüyü işlər öz praktiki nəticələrini verməkdədir”.