Onkoloji xəstəliklərin müalicəsinin İcbari Tibbi Sığortanın Xidmətlər Zərfinə daxil edilməsi ilə bağlı Səhiyyə Nazirliyi və aidiyyəti qurumlarla görüşlər keçirilib, hazırda danışıqlar aparılır.

Valyuta.az xəbər verir ki, bunu jurnalistlərə açıqlamasında İcbari Tibbi Sığorta üzrə Dövlət Agentliyinin sədri Zaur Əliyev deyib.

O bildirib ki, bunun üçün dəqiq hesablamalar olmalıdır.

"Bu sahədə bizə kömək etməyə Litvadan mütəxəssislər də gəlib. Türkiyədən də mütəxəssislərin gələcəyi gözlənilir. Ümid edirik, bu ilin sonuna bununla bağlı müəyyən nəticələr əldə olunacaq. İmkan olsa bütün xəstəlikləri İTS çərçivəsində təmin edərik. Onkoloji xəstəliklər arasında ölkəmizdə ən çox süd vəzi xərçəngi yayılıb. İlk başlarda bu kimi xəstəliklərə üstünlük veriləcək" - deyə o qeyd edib.

O, çıxışı zamanı həmçinin bildirib ki, SMA xəstələri barədə də araşdırmalar aparılıb:

"Bu böyük vəsait tələb edən xəstəlikdir. Biz bu istiqamətdə işləyirik. İnanıram ki, bununla bağlı da bir həll tapacağıq".