Son 30 ildə Azərbaycanda əhalinin hər 1000 nəfərinə görə təbii artımı 4 dəfə azalıb. 

Valyuta.az xəbər verir ki, Bakı Araşdırmalar İnstitutu (BAİ) apardığı araşdırmadan sonra bu qənaətə gəlib. Tədqiqat 1990-2020-ci illərin statistika rəqəmlərininə əsaslanıb. 
Son 30 ildə hər min nəfərə görə doğulanların sayı 12,7 nəfər təşkil edib. Bu, son 76 ilin ən aşağı göstəricidir. 

Bu müddətdə təbii artım isə 5,1 nəfər təşkil edib ki, bu da son 75 ilin ən aşağı göstəricisidir. 

Azərbaycanda demoqrafik vəziyyətin pisləşdiyini deyən iqtisadçı ekspert Samir Əliyev bu məsələdə pandemiyanın katalizator rolunu oynayaraq vəziyyəti fəlakət həddinə çatdırdığını vurğulayıb: 

“Təsəvvür edin ki, təbii artım və doğum səviyyəsi son dəfə İkinci Dünya müharibəsinin sonunda bu həddə düşmüşdü. Hətta 90-cı illərin ağır sosial-iqtisadi vəziyyəti və I Qarabağ savaşı təbii artıma və doğuma bu qədər zərbə vurmamışdı. Ölüm isə son dəfə 1955-ci ildə bu qədər yüksək həddə olub.  Pandemiya və az da olsa II Qarabağ savaşı ölüm statistikasını 65 illik rekord həddə çatdırıb”.