Azərbaycanda Qiymətləndiricilər Palatasının yaradılmasının nəzərdə tutulub

Azərbaycanda “Qiymətləndirmə fəaliyyəti haqqında” yeni qanunun qəbul edilməsi gözlənilir. 

Valyuta.az xəbər verir ki, artıq qanun 32 maddədən ibarət yeni qanun layihəsi hazırlanıb və müzakirəyə cıxarılıb. 

Mütəxəssislər hər zaman qiymətləndirmə sahəsində hüquqi bazanın müasir tələblər və mövcud bazar şərtləri ilə uzlaşmaması səbəbindən qiymətləndiricilərin sahibkarlıq subyekti kimi inkişafında müəyyən çətinliklər olduğunu qeyd edirlər. 

Artıq yeni qanunun qüvvəyə minməsindən sonra bunların arxada qalacağına ümid edirlər. 

Yeniliklər barədə məlumat verən "Unipirice" Ekspertiza və Qiymətləndirmə Mərkəzinin direktoru Ramil Qasımzadə Valyuta.az-a açıqlamasında, Azərbaycanda Qiymətləndiricilər Palatasının yaradılmasının nəzərdə tutulduğunu bildirib. 

Onun sözlərinə görə, bundan başqa, qiymətləndiricilərin peşə hazırlığı və ixtisaslarının artırılması, ixtisas imtahanının təşkili və keçirilməsi qanunla təsbit edilir.  

“Qiymətləndirici təşkilatlara dair tələb və vəzifələr də yenilənib. Qəsdən ağır və xüsusilə ağır cinayət törədən, korrupsiya cinayəti və qulluq mənafeyi əleyhinə, habelə iqtisadi sahədə cinayət törədən və məhkumluğu götürülməmiş şəxslər qiymətləndirici ola bilməyəcəklər” – Mərkəz direktoru vurğulayıb.

Zeynəb Vəkil