“Bakıda küləklərin getdikcə çoxalması dünyada baş verən qlobal iqlim dəyişmələri ilə əlaqədardır”. 

Valyuta.az xəbər verir ki, bunu AMEA akademik H.Ə.Əliyev adına Coğrafiya İnstitutunun direktoru, akademik Ramiz Məmmədov, ARB kanalına müsahibəsində deyib. 

Külək və onun fəsadları haqqında danışan R.Məmmədov, bu təbiət hadisəsinin getdikcə daha da artacağını bildirib və onların həm tezliyinin, həm də amplitudunun (gücünün) artmasının gözlənilən olduğunu vurğulayıb. 

Akademik deyib ki, küləyin fəsadları təkcə evlərin dam örtüklərinin uçması, ağacların aşması kimi hallarda özünü göstərmir:

“Bu fəsadlar açıq dənizdə gəmilərin hərəkətində, neftçilərin fəaliyyətində, tikintidə daha kəskin şəkildə özünü büruzə verir. Xalq arasında “qara yel” deyilən güclü külək əkin sahələrində bitkilərin məhvinə  də səbəb ola bilər”.

“Bəs, küləyin fəsadlarından necə qorunmalı” sualına cavab verən alim bildirib ki, ondan qorunmaq yox, ona adaptasiya olunmaq lazımdır:

“İnsanlar belə hadisələrin istənilən an baş verə biləcəyini nəzərə almalı, həmişə hazırlıqlı olmalıdırlar”.