2021-ci ilin yanvarında Azərbaycanın dövlət büdcəsinin gəlirləri ötən ilin eyni dövrü ilə müqayisədə artıb. 

Valyuta.az Mərkəzi Bankın hesabatına istinadən xəbər verir ki, ilk ayda gəlirlərin həcmi 2 milyard 320,6 milyon manat olub. Bu, ötən ilin yanvarındakı nəticədən 27 faiz və ya 499,6 milyon manat çoxdur. 2020-ci ilin ilk ayında büdcə gəlirləri 1 milyard 821 milyon manat olub. Büdcə gəlirlərinin ÜDM-də xüsusi çəkisi təxminən 10% artaraq 37,1%-ə çatıb. 

Gəlirlərin artması fonunda yanvarda büdcənin xərcləri ötən illə müqayisədə 12% və ya 171 milyon manat azalıb. Əgər 2020-ci ilin yanvarında xərclər 1 milyard 402,9 milyon manat olubsa, bu ilin ilk ayında həmin göstərici 1 milyard 231,9 milyon manat olub. 

Nəticədə büdcənin icrasında 1 milyard 88,7 milyon manat həcmində profisit əmələ gəlib. Profisitin ÜDM-də xüsusi çəkisi 17,4% təşkil edib.