"İşğaldan azad edilmiş ərazilərimizdə ən vacib işlərdən biri yol infrastrukturunun bərpası və genişləndirilməsidir. Müasir yollar olmadan uğurlu bərpa və məskunlaşma çətin olar. Hətta elə yol şəbəkəsi qurulmalıdır ki, orada məskunlaşan insanları və oralarda yaradılan təsərrüfat subyektlərini torpağa “bağlasın”. 

Valyuta.Az xəbər verir ki, bunu yol hərəkəti üzrə ekspert Ərşad Hüseynov deyib.

Onun sözlərinə görə, yolların bərpası və yol şəbəkəsinin genişləndirilməsi zamanı işğaldan əvvəlki ciddi səhvlərimiz düzəldilməlidir.

"Qərb sərhədlərimiz boyu müasir yolların olmasına xüsusi diqqət yetirilməlidir. Təəssüflə qeyd etmək istəyirəm ki, sərhədyanı rayonlarımızı və Şuşanı 1992-1993-də itirməyimiz həm də yol şəbəkəsinin yetərli olmaması ilə bağlı idi. Hər kəs gözəl bilir ki, 1992-ci ildə işğaldan əvvəl Şuşa şəhəri və ətraf kəndlər, həmçinin bütöv Laçın və Kəlbəcər rayonu yarımblokadaya düşmüşdü. Belə blokadanı yeganə yolun bərbad vəziyyətdə olması daha da qəlizləşdirirdi. Ona görə də Göygöl və Daşkəsən istiqamətindən Kəlbəcərə, daha sonra Kəlbəcərdən Laçına, həmçinin, Qubadlı istiqamətindən Laçına ərazinin relyefinə uyğun, istənilən fəsildə istismara yaralı, özü də imkan daxilində alternativi olan yollar çəkilməlidir".

Ekspert qeyd edib ki, işğal zonasından kənarda olan Qərb rayonlarımızda da yetərincə əlaqəni təmin edən yollar hələ yoxdur.

"Məsələn, qonşu olan Gədəbəy və Daşkəsən rayonlarının mərkəzlərindən bir-birinə getmək üçün Gəncə və Şəmkirdən keçməklə 80 km-dən artıq məsafə qət etmək lazım gəlir. Amma bu rayon mərkəzlərini birləşdirmək üçün təxminən 20-25 km-lik yol tikilməlidir. Düşünürəm ki, Qərb rayonlarımızın hamısını birləşdirən mükəmməl və müasir yol şəbəkəsi çəkilməlidir. Məsələn, Tovuzdan çıxırsan yola, çox rahat yolla hər yerdə dağlarla hərəkət edərək (Gədəbəy, Daşkəsən, Kəlbəcər, Laçın və Qubadlıdan) bir neçə saata Zəngilana çatırsan".