Ermənistanın iqtisadiyyat naziri Vaan Kerobyan qarşıdakı 6 ay ərzində İranla ticarət həcminin iki dəfə artırılacağını deyib.

Nazir göstərilən müddətdə iki ölkə arasında ticarət həcminin 400 milyondan 1 milyard dollara çatdırmağı hədəfə aldıqlarını bildirib.

Kerobyana cavab verən keçmiş maliyyə naziri Vardan Aramyan isə hesab edir ki, altı ay ərzində İranla ticarətin iki dəfə artırılması üçün heç bir şərait yoxdur: “Həyatda heç bir şey mümkünsüz deyil, amma həmişə mövcud şərtləri nəzərə almalısan. İqtisadiyyat naziri ticarət dövriyyəsinin iki dəfədən çox artacağını bəyan edərkən, ondan soruşmaq lazımdır: hansı amillərə görə?”

Vardan Aadamyanın sözlərinə görə, Ermənistan iqtisadiyyatındakı çöküşün sürətləndirdiyi bir vaxtda İrandan idxal və ixracatın artmasını gözləmək mümkün deyil: “İrandan mal idxalının kəskin şəkildə artması üçün Ermənistanda onlara olan tələb kəskin artmalıdır. Ancaq ölkə iqtisadiyyatındakı vəziyyət buna imkan vermir. Qarşıdakı 6 ay ərzində böhranın aradan qalxacağı da mümkün deyil”.

Keçmiş maliyyə naziri Ermənistan hökumətinə İran mallarının başqa bir ölkənin malları ilə əvəz edilməsi təklifini verib. Lakin İran mallarının Türkiyə mallarını əvəz edə biləcəyi ilə bağlı suala cavab verməkdə çətinlik çəkib: “Məsələn, türk inşaat materialları istehlakçısı dərhal İran məhsullarına keçməyəcək. Qiymət, keyfiyyət və sair məsələlər var”. 

// teleqraf.com