"Apple" şirkəti bir sıra cihazların servis və texniki dəstəyinə çıxışı məhdudlaşdıraraq, onları "köhnəlmiş və ya vintaj" məhsullar siyahısına əlavə edib. 

Valyuta.az xəbər verir ki, bu barədə "MacRumors" portalı məlumat yayıb.

Vintaj cihazlar siyahısına "iPhone 7 Plus" və "iPhone 8" modelinin iki versiyası - 64 GB və 256 GB yaddaşa malik modellər əlavə olunub. Yalnız 128 GB yaddaşa malik versiya hələ ki, siyahıya daxil edilməyib, çünki bu model digər ikisindən daha uzun müddət satışda olub. Bundan əvvəl iPhone 8-in bütün (PRODUCT)RED modifikasiyaları da bu siyahıya salınmışdı.

"Apple" cihazları vintaj sayırsa, bu o deməkdir ki, satışdan çıxarıldığı tarixdən beş il keçib. Belə cihazların təmiri rəsmi "Apple" mağazalarında və avtorlaşdırılmış servis mərkəzlərində mümkündür, lakin lazımi ehtiyat hissələrinin olmaması halında təmirdən imtina edilə bilər.

Bundan əlavə, "iPad Air 2" və "iPad mini 2" modelləri vintaj kateqoriyasından çıxarılaraq, tamamilə köhnəlmiş cihazlar statusu alıb. "Apple" bu statusu cihaz satışdan yeddi il keçdikdən sonra tətbiq edir. Bu cür məhsullar artıq rəsmi servis mərkəzlərində təmir olunmur və onların bərpası üçün lazım olan hissələr istehsal və təchiz olunmur.

Paşa Məmmədli