2025-ci ilin ilk rübündə dünyada ən çox satılan planşet markaları açıqlanıb. 

Valyuta.az xəbər verir ki, "Canalys" tərəfindən yayımlanan hesabatda texnologiya nəhəngi "Apple" ötən illərdə olduğu kimi bu il də böyük fərqlə liderliyini qoruyub.

Şirkət ən yaxın rəqibini iki dəfədən çox geridə qoyaraq planşet bazarında birinciliyə sahib olub.

Telefon və kompüterlər qədər geniş istifadə olunmasalar da, planşetlər bu gün də dünyanın dörd bir tərəfində milyonlarla insanın gündəlik işlərini asanlaşdırır.

"Canalys"in hesabatı 2025-ci ilin ilk üç ayını əhatə edir və bu müddətdə ən çox satılan planşet markalarını ortaya qoyur. Hesabata görə, qlobal planşet bazarı 2025-ci ilin ilk rübündə ötən ilin eyni dövrü ilə müqayisədə 8 faiz böyüyərək 36,8 milyon ədəd satışa çatıb.

Belə ki, "Apple" planşet bazarında yenə də rəqibsiz olub. Bu uğurun əsas səbəbi isə M seriyalı çiplərlə təchiz olunmuş "iPad" modellərinin performansı ilə bağlıdır. 

ABŞ mənşəli texnologiya nəhəngi 2025-ci ilin ilk üç ayında 13,7 milyon planşet satışı həyata keçirib ki, bu da ötən ilin eyni dövrü ilə müqayisədə 14 faiz artım deməkdir. Beləliklə, "Apple" qlobal bazarın 37 faizinə sahibdir.

İkinci yerdə 6,6 milyon satış və 18 faiz bazar payı ilə "Samsung" qərarlaşıb. Üçüncü pillədə isə 3 milyon ədəd satışla "Xiaomi" yer alır.

Sərvanə Rəmixanova