İnflyasiya bir ölkədə mal və xidmətlərin qiymətlərinin davamlı şəkildə artmasıdır. Bu proses nəticəsində pulun alıcılıq qabiliyyəti azalır və insanlar eyni miqdarda vəsaitlə əvvəlkindən daha az məhsul ala bilirlər.

Valyuta.az xəbər verir ki, inflyasiya ölkənin iqtisadi vəziyyətini əks etdirən mühüm göstəricidir.

Mərkəzi banklar və hökumətlər bu göstəriciyə əsaslanaraq iqtisadi qərarlar qəbul edirlər. Yüksək inflyasiya olduqda faiz dərəcələri artırılır, bu da pul dövriyyəsini azaldır; əgər inflyasiya aşağı səviyyədədirsə, faizlər endirilir və iqtisadi fəallıq stimullaşdırılır.

İnflyasiya əhalinin real gəlirlərinə – maaşlara, pensiyalara və sosial ödənişlərə birbaşa təsir edir. Qiymətlərin artması ilə bu gəlirlərin də mütənasib şəkildə artırılması zəruridir, əks halda əhalinin alıcılıq gücü zəifləyir.

Eyni zamanda, sabit inflyasiya ölkəyə xarici investorların marağını artırır. Əksinə, inflyasiyanın yüksək olması məhsul və xidmətlərin bahalaşmasına, həmçinin ixracın azalmasına gətirib çıxara bilər.

Dünya iqtisadiyyatının ilk 10 ölkəsində inflyasiya göstəriciləri:

Amerika Birləşmiş Ştatları – 2,9%

Çin Respublikası – 0,4%

Almaniya – 2,3%

Yaponiya – 2,2%

Hindistan – 4,3%

İngiltərə – 2,6%

Fransa – 2,3%

İtaliya – 1,2%

Kanada – 2,4%

Braziliya – 4,3%

Bu göstəricilərdən görünür ki, inkişaf etmiş ölkələrdə inflyasiya əsasən 2-3% civarında qalır, bu da sabit və idarəolunan iqtisadi mühitin mövcudluğunu göstərir. İnkişaf etməkdə olan ölkələrdə isə inflyasiya nisbətən yüksəkdir və bu, onların iqtisadi sabitliyinə birbaşa təsir edir.

Maya Hüseynova