"Dünyanın ən kasıb prezidenti" kimi tanınan Uruqvayın sabiq lideri Xose Mujika vəfat edib

Valyuta.az xəbər verir ki, Uruqvayın sabiq prezidenti, siyasi lider Xose Mujika 89 yaşında vəfat edib.

1935-ci ildə kasıb ailədə doğulan Mujika gəncliyində hökumət əleyhinə silahlı mübarizəyə qoşulub və hərbi rejim dövründə ümumilikdə 10 ildən çox həbs həyatı yaşayıb.

Uruqvayda demokratiya bərpa edildikdən sonra 1990-cı illərdən etibarən solçu deputat kimi parlamentdə fəaliyyət göstərib. 2010-cu ildə ölkənin prezidenti seçilən Mujika bu vəzifəni beş il icra edib.

Prezidentliyi dövründə də kənddəki kiçik fermasında yaşamaya davam edən Mujika sadə və təvazökar həyat tərzi ilə xalqın rəğbətini qazanıb. Onun kütləvi istehlakçılıq meyillərinə qarşı etdiyi tənqidi çıxış bir çox ölkədə tərcümə olunaraq geniş auditoriya tərəfindən rəğbətlə qarşılanıb.

Son illərdə xərçənglə mübarizə aparan Mujikanın vəziyyətinin ağır olduğu bildirilirdi. Son mediada yayılan məlumatlara görə, o, xəstəliyin terminal mərhələsində idi və ağrıların, narahatlığın azaldılmasına yönəlik müalicə alırdı.

Uruqvay prezidenti Yamandu Orsi çərşənbə axşamı sosial şəbəkələrdə verdiyi açıqlamada Mujikanın vəfatını elan edib.

Sərvanə Rəmixanova