Uşaqlığı Qərbi Azərbaycanda keçir, zəngin ailədə böyüyür. Sonra ailə hər şeyini itirir və Bakıya köçür. O, 10-12 yaşlarda Azərbaycan Dövlət Neft və Sənaye Universitetinin qarşısında dondurma, alça, qarğıdalı, köynək, tum və s. satıb ailəyə dəstək olmağa çalışır. Zamanla bu bacarığını inkişaf etdirir, təhsil alır və idarəetmədə də uğurlu karyera qurur. Paraleldə isə biznesdə addım atır.

Söhbət “Destec Group”un İdarə Heyətinin sədri, “Hazel” brendinin həmtəsisçisi, Azərbaycan Dövlət Neft və Sənaye Universitetinin müəllimi Sakit Səmədovdan gedir. Yəni, bir vaxtlar qarşısında alça satdığı məktəbdə müəllim olaraq çalışır.

Qeyd edək ki, S.Səmədov Türkiyənin Dokuz Eylül Univeristetində bakalavr, magistr və doktorantura təhsili alıb. 16 il Türkiyədə yaşayıb. “Socar Turkiye” (Petkim) satış və marketinq müdir müavini və Vitse-prezidenti olub. Türkiyədə qida və pərakəndə sektorunda tanınmış bir neçə şirkətin brendləşməsində xüsusi rolu vardır.