​“Bunun adı vətəndaşın cibinə girmək deyil, bəs nədir? “Azəriqaz” sayğacımızı bloklayıb, bizi qazsız qoyub”.

Bunu jurnalist Aytən Məmmədova sosial şəbəkə hesabında yazıb. O qeyd edib ki, “Azəriqaz” smart sayğacı mexaniki sayğacla dəyişir:

“Dirəşib ki, smart sayğacınızı (kartla balans yüklənən) dəyişməliyik, mexaniki sayğacla əvəzləməliyik. Deyirik ki, bizim sayğacla bağlı heç bir problem yoxdur, niyə dəyişirsiniz?

Deyirlər, istismar müddəti bitib. Yaxşı, dəyişmək istəyirsinizsə, o zaman smart tipli sayğacla əvəzləyin. Deyirlər ki, yox, mexaniki sayğacla əvəz edəcəyik”.

A. Məmmədovanın sözlərinə görə, bu sayğaclardan şikayətlər kifayət qədər çoxdur:
“Abonentlərə məhz mexaniki sayğaclar vasitəsilə artıq sərfiyyat yazıldığı iddia edilir. Bunun nəticəsidir ki, artıq borc yazılmasına görə hazırda məhkəmələrdə “Azəriqaz”la vətəndaşlar arasında yüzlərlə mübahisə var. Əksəriyyətində də sonda vətəndaşların xeyrinə qərar çıxarılır. Çünki vətəndaşların üzərinə istifadə etmədiyi qaza görə pul yükləməyə çalışırlar.

Smart sayğaclarda bunu eləmək olmur deyə, onları mexaniki sayğaclarla əvəzləyirlər.
Mən oturduğum yerdə sayğacımı bloklamaq, artıq qaz pulu ödətdirmək üçün smart tipli sayğacımı mexaniki ilə əvəzləməyə məcbur eləmək nə deməkdir?”

Jurnalist əlavə edib ki, sayğacı dəyişsələr belə, məhkəməyə müraciət edəcək, presedent olsun.
Mövzu ilə bağlı “Azəriqaz”a müraciət etsək də, cavab almaq mümkün olmadı.

©Yeniavaz.com