"Google" film istehsalına qədəm qoyur: Yeni layihələr nələr vəd edir?

"Google" yeni qurduğu "100 Zeros" adlı prodakşn şirkəti vasitəsilə film və televiziya şouları istehsal etməyə başlayır. Bu təşəbbüs, "YouTube" platformasının məzmun baxımından necə yenidən formalaşdırılacağını göstərən əhəmiyyətli bir addım olaraq qiymətləndirilir.

Valyuta.az xəbər verir ki, "Google" film istehsalına daxil olaraq öz məzmun istehsal prosesini başlatmağı və daha geniş auditoriyaya çatmağı hədəfləyir. 

"100 Zeros" prodakşn bölməsi, şirkətin markasına müsbət imic qazandıracaq layihələr üzərində çalışacaq. Bu çərçivədə "Range Media Partners" adlı məşhur istedad idarəetmə və prodakşn şirkəti ilə əməkdaşlıq qurulub. Məqsəd, xüsusilə gənc izləyicilərə xitab edən layihələr seçmək və bu layihələr vasitəsilə "Google" məhsullarına qarşı müsbət yanaşma formalaşdırmaqdır.

Bu təşəbbüsün əsas xüsusiyyətlərindən biri, layihələrdə məhsul yerləşdirmə imkanları yaratmaq olacaq. Lakin bu yalnız başlanğıcdır. Əsas məqsəd texnologiyaya müsbət baxan və texnoloji mövzuları ön plana çıxaran layihələrə sərmayə yatıraraq daha geniş izləyici kütləsinə çatmaqdır.

"100 Zeros"un hazırda üzərində işlədiyi layihələrdən biri müstəqil dəhşət filmi olan "Cuckoo"nun marketinqinə maliyyə dəstəyi verməkdir. Bu, "Google"ın film və televiziya sahəsindəki ilk iddialı addımlarından biri kimi dəyərləndirilir.

"Google"ın bu addımı "YouTube"un gələcəyi baxımından da əhəmiyyətlidir. Şirkət daha əvvəl "YouTube Premium" abunəlik xidməti çərçivəsində "YouTube Originals" adı ilə müxtəlif proqramlar hazırlamış, lakin bu layihələr geniş auditoriyaya çatmaqda çətinlik yaşamışdı.

İndi isə "100 Zeros" təşəbbüsü ilə "YouTube" üzərindən yayımlanacaq böyük büdcəli, diqqətçəkən və səs-küylü serial və filmlərin istehsalı nəzərdə tutulur. Bu da "YouTube"un "Netflix" və ya "Amazon Prime" kimi məzmun platformalarına bənzər bir xidmət təqdim etməyə başlayacağı ehtimalını gücləndirir.

Paşa Məmmədli