Alman avtomobil istehsalçısı BMW 2025-ci ildə ABŞ-dan gələn gömrük tariflərinin təsirini aradan qaldırmağa ümid etdiyini, lakin şirkəti "dalğalı bir il"in gözlədiyini bildirib.

Valyuta.az xəbər verir ki, avtomobil istehsalçısı bu il üçün daha əvvəl açıqladığı proqnozlara sadiq qaldığını açıqlayıb. BMW 2025-ci ildə vergi öncəsi mənfəətin (EBT) daha bahalı mühərrik modellərinə olan tələbin təsiri ilə 2024-cü il səviyyəsində qalacağını gözləyir.

AFP-nin məlumatına görə, Münhen mərkəzli avtomobil istehsalçısı "BMW Group" ABŞ-ın tətbiq etdiyi gömrük rüsumlarının təsirini azaltmağı ümid etdiklərini, lakin qarşıda dalğalı bir ilin dayandığını bildirib. Şirkət həmçinin bəzi gömrük tariflərinin müvəqqəti olacağını və 2025-ci ilin iyul ayından etibarən endirimlər ediləcəyini gözlədiyini vurğulayıb.

ABŞ prezidenti Donald Trampın yerli istehsalı artırmaq məqsədilə bir sıra gömrük rüsumu təhdidləri irəli sürdüyü və tətbiqə başladığı qeyd olunur. Bu tədbirlər çərçivəsində, aprel ayından etibarən bir çox avtomobil idxalına 25 faiz gömrük vergisi tətbiq edilir.

BMW davam edən danışıqlar və vəziyyətin qeyri-sabitliyi səbəbindən hazırkı maliyyə ilində tariflərin mümkün təsirini yalnız təxmin edə bildiklərini qeyd edib.

Şirkət bu ilin ilk rübündə 2,17 milyard avro (2,47 milyard dollar) xalis mənfəət və 3,11 milyard avro EBT açıqlayıb. Bu göstərici, analitiklərin 2,85 milyard avro səviyyəsindəki gözləntilərini üstələyib.

Bununla belə, bu rəqəmlər ötən ilin eyni dövrü ilə müqayisədə təxminən 25 faiz azalıb. BMW BYD kimi yerli rəqiblərlə rəqabətdə açar bazar olan Çində çətinliklərlə üzləşir.

Şirkət həmçinin bildirib ki, oktyabr ayında Avropa İttifaqının Çindən idxal edilən elektrikli avtomobillərə tətbiq etdiyi gömrük tarifləri səbəbindən ilk rübdə üç rəqəmli milyon avro səviyyəsində zərər görüb.

Paşa Məmmədli