Azərbaycanda ali təhsilin forma və mərhələləri üzrə ikinci ali təhsil xüsusi yer tutur. Bu təhsil növü əvvəlki ixtisasından fərqli olaraq digər sahədə təhsil almaq istəyənlər üçün nəzərdə tutulub. 

İkinci təhsil üçün şərtlər nələrdir?

Məsələ ilə bağlı təhsil eksperti Kamran Əsədov açıqlama verib:

"Qanunvericiliyə əsasən, ikinci təhsilə yalnız bakalavr diplomu olan şəxslər müraciət edə bilər. Ali təhsil müəssələrini bitirmiş şəxslərin ikinci ali təhsil almaq imkanı var. Yəni şərt olaraq ixtisasından asılı olmayaraq hər bir şəxs istədiyi universitetdə oxuya bilər. Bunun üçün may ayının 1-dən avqustun 30-na qədər həmin şəxslər portal.edu.az saytına daxil olaraq şəxsi kabinet yaratmaq lazımdır. Daha sonra isə lazım olan sənədləri portala yükləmək lazımdır. 

İkinci ali təhsil almaq 2 formatda həyata keçirilir. 

Birinci forma ondan ibarətdir ki, imtahan keçirilir. Bu imtahanı DİM keçirmir. Ali təhsil müəssisəsi özü keçirir. Digər üsul isə müsahibə üsulu ilə keçirilir. İmtahanlar daha çox BDU və NDU-da hüquq ixtisasında olur. Yəni bu ixtisasa daxil olmayaq istəyən şəxslər bakalavr təhsilindən asılı olmayaraq təhsil ala bilərsiniz". 

Ekspert qeyd edib ki, hüquq və tibb istinsa olmaqla istənilən ixtisasa müsahibə yolu ilə qəbul var. Lakin pedaqoji ixtisaslara ikinci təhsil şamil olunmur. İkinci təhsil yalnız ödənişli əsaslarla mümkündür. Yəni, hər hansı imtiyazlı təbəqə bundan istifadə edə bilməz.

"Yəni məcburi köçkün və ya digər imtiyazlı kateqoriyadan olan şəxslər ikinci ali təhsildən yararlana bilməzlər. Onlar yalnız DİM-in keçirdiyi imtahanlarda iştirak edərək ikinci, üçüncü təhsil belə alsalar, onlara təhsil pulsuzdur. Amma DİM olmadan portal vasitəsi ilə ali təhsil müəssəsinə müsahibə yolu ilə daxil olsalar bu zaman təhsil ödənişlidir". 

©milli.az