"Azergold" QSC aeroelektromaqnetik geofiziki tədqiqat işləri aparmağı planlaşdırır.

Valyuta.az xəbər verir ki, aeroelektromaqnetik geofiziki tədqiqat işləri aparılacaq sahələr Naxçıvan Muxtar Respublikasının Göydağ-Zırnel-Kükü və Kəlbəcər rayonun Tutxun-Şorbulaq sahələrinin potensial perspektivli əraziləridir. 

Məlumata görə, bu tədqiqat işlərinin həyata həyata keçirilməsi üçün şirkət 12 milyon 789 min 838 manat ayırıb. Bu şirkətlə müqavilə bağlamaq istəyən şirkətlər üçün son müraciət olunma tarixi iyulun 12-si təyin olunub. Xatırladaq ki, “Azergold” QSC-nin qanuni təmsilçisi  İbrahimov Zakir Zaur oğludur. Şirkətin nizamnamə kapitalı 62 milyon manatdır. 

Qeyd edək ki, "AzerGold" Qapalı Səhmdar Cəmiyyəti Azərbaycan Respublikasının Prezidenti cənab İlham Əliyevin 11 fevral 2015-ci il tarixli 1047 nömrəli Sərəncamına uyğun olaraq təsis edilib, 5 iyul 2016-cı il tarixində dövlət qeydiyyatına alınaraq fəaliyyətə başlayıb.

“AzerGold” QSC əlvan və qara metal filizi yataqlarının öyrənilməsini, tədqiqini, kəşfiyyatını, işlənməsini və idarə olunmasını, bu sahədə yeni texnologiyaların tətbiqini, maddi-texniki bazanın müasirləşdirilməsini və ondan səmərəli istifadəni, habelə bu sahənin inkişafı ilə bağlı digər işləri yerinə yetirir.

Sərvanə Rəmixanova