Uğurlu karyera qurmaq üçün hansı təhsil formasının daha effektli olduğu bu gün də aktuallığını qoruyur. Xüsusilə peşə təhsilinin bu prosesdəki rolu və onun yetərliliyi geniş müzakirə mövzusudur.

Bəs uğurlu karyera üçün peşə təhsili kifayətdirmi?

Mövzu ilə bağlı Valyuta.az-a danışan təhsil mütəxəssisi Qoşqar Məhərrəmov bildirib ki, müasir dövrdə bilik və bacarıqların sürətlə yeniləndiyi bir zamanda yaşayırıq. Əgər əvvəllər bir sahədə əldə edilən biliklər 5-10 il ərzində aktual qalırdısa, bu gün həmin biliklər bir ilə, bəzən isə daha qısa müddətə köhnəlir. Bu reallıq bizə göstərir ki, istər peşə, istər ali, istərsə də orta təhsil olsun, alınan təhsilin ömürlük kifayət etməsi artıq mümkün deyil.

Mütəxəssis artıq bir sertifikat proqramı və ya konkret bir bacarıqla peşəyə yiyələnməyin mümkün olduğunu, lakin bunun yetərli olmadığını vurğulayıb:

"Əgər insan özünü mütəmadi olaraq yeniləmirsə, dövrlə ayaqlaşmırsa, bu zaman ən yaxşı təhsil belə funksionallığını itirə bilər. Bu, yenilənməyən mobil tətbiqlərə bənzəyir – bir müddətdən sonra artıq işə yaramır".

Q.Məhərrəmovun sözlərinə görə, peşə təhsili uğurlu karyeraya başlamaq üçün imkan yaratsa da, onun davamlı olması üçün öyrənmək və inkişaf etmək mütləqdir:

"Yalnız texniki biliklər deyil, yumşaq bacarıqlar, öyrənmə bacarığı və təşəbbüskarlıq da vacibdir. Eləcə də, sahədəki yenilikləri izləmək və onları özü-özünə öyrənmək önəm daşıyır".

Q.Məhərrəmov sonda Azərbaycanda peşə sahəsində fəaliyyət göstərən, uğurlu nəticələr verən təhsil müəssisələrinin mövcudluğunu da qeyd edib:

"Bu müəssisələrdə keyfiyyətli peşə təhsili almaq və yaxşı karyeraya başlamaq mümkündür. Lakin burada əsas şərt dəyişmir: daim öyrənmək, dəyişikliklərə uyğunlaşmaq və özünü inkişaf etdirmək".

Maya Hüseynova