"Aşağı seqmentdə nisbi qiymət artımı var. Yuxarı seqmentdə isə pandemiyadan sonra ilk dəfə çox ciddi stabillik, qeyri-dinamik vəziyyət müşahidə olunur".

Bunu əmlak məsələləri üzrə ekspert Ramil Osmanlı hazırda mənzil bazarında qiymətlər necə dəyişməsindən danışarkən deyib.

O bildirib ki, satış həcminin əhəmiyyətli dərəcədə azalması var: "Həmçinin, müraciətlərin və tələbin azalması müşahidə olunur. Hətta bəzi ərazilər üzrə yuxarı seqmentə aid olan, qiyməti təqribən 350-400 min manatdan yuxarı olan əmlaklarda müəyyən qədər azalmalar da müşahidə olunur".

Yaxınlaşmaqda olan yay fəslində bağ evlərinə marağın necə olacağına gəlincə, ekspert hələki o istiqamətdə ciddi dəyişiklik müşahidə edilmədiyini söyləyib:

"Düşünürəm ki, may ayının ilk ongünlüyündə bu proseslə bağlı hər hansı nisbi aktivlik müşahidə olunacaq. Bağ evlərinə maraq olması mövsümə bağlı olan hadisədir. Mövsüm aylarında müşahidə olunan tendensiyadır. Hələ bu istiqamətdə ciddi dəyişiklik olmadığına görə indidən vəziyyətin necə olacağını, dəyişikliyin hansı formada olacağını söyləmək çətindir. Ötən il bağ evlərinə maraq var idi. Pandemiyadan sonra quru sərhədlərinin bağlı olması respublikanın regionlarında, paytaxt və Abşeron ərazisində bağ sahələrinə, fərdi yaşayış evlərinə kirayə formasında tələbi xeyli artırıb. Sözsüz ki, xaricdən gələnlər də var. Bəzi kütləvi tədbirlər zamanı otel çatışmazlığı meydana çıxır. Bu, gündəlik kirayə məqsədləri üçün verilən həm mənzillərin, həm də fərdi yaşayış evlərinin qiymətinə əhəmiyyətli dərəcədə təsir göstərir. Konkret yay mövsümünə gəldikdə, bu zaman turist axını olur, tələb artır və  bu, qiymətə təsir göstərir".

©unikal