ABŞ-ın ticarət müharibələrinə start verməsi, tarif şokları və bazarların dəyişməsi səbəbindən qlobal inam azalır və bu, artan böyümə riskləri arasında daha ciddi bir təhlükəyə çevrilməkdədir.

Valyuta.az-ın məlumatına görə, "Financial Times" qəzeti bu həftə Vaşinqtonda keçiriləcək mühüm iqtisadi siyasət müzakirələri ərəfəsində apardığı araşdırmada qeyd edib ki, ABŞ mənşəli ticarət şokları həm inamı sarsır, həm də maliyyə bazarlarına mənfi təsir göstərərək qlobal iqtisadi artımı təhlükə altına alır.

Brukinq İnstitutu və "Financial Times" tərəfindən hazırlanmış Brukinq-FT Qlobal İqtisadi Dirçəlişin İzləmə İndeksi ("Tiger") göstəricilərinə əsasən, inam göstəriciləri kəskin şəkildə azalıb, maliyyə bazarlarında isə ümumi vəziyyət pisləşib. Qlobal iqtisadi mənzərədəki bu geriləmə, ilin nisbətən möhkəm başlanğıcı ilə kəskin təzad təşkil edir.

Brukinq İnstitutunun baş tədqiqatçısı Esvar Prasad bildirib ki, dünyada iqtisadi tənəzzül (resessiya) olacağını söyləmək üçün hələ tezdir, lakin qlobal ticarətdəki daralma və artan siyasət qeyri-müəyyənliyi iqtisadi artımı əhəmiyyətli dərəcədə məhdudlaşdıracaq: "Bu böyük şoku artıq gördük. İxracata dayanan açıq iqtisadiyyatlar sıxışacaq və bundan əlavə mənfi inam təsirləri də yaşanacaq".

Bu nəticələr Donald Trampın ABŞ prezidenti kimi vəzifəyə başlamasından sonra dünyanın müxtəlif yerlərindən iqtisadi siyasətçilər və maliyyə nazirlərinin ilk dəfə BVF/Dünya Bankı Bahar Toplantıları üçün Vaşinqtonda bir araya gəldiyi vaxt açıqlanıb.

Hesabata görə, ABŞ-da real iqtisadi fəaliyyət göstəriciləri hələlik nisbətən güclü qalır. Lakin bu məlumatlar 2025-ci ilin yanvarına qədər olan dövrü əhatə edir və Trampın ticarət siyasətlərinin başlamasından əvvəlki dövrə aiddir.

Mart ayında pərakəndə satışların 1,4 faiz artması kimi bəzi göstəricilər ABŞ iqtisadiyyatında fəaliyyətlərin güclü olduğunu göstərsə də, bu artımın bir hissəsi tariflərdən əvvəl alış-veriş edən istehlakçılardan və avtomobil satışlarındakı artımdan qaynaqlanmış ola bilər.

"Tiger" hesabatında yer alan maliyyə bazarları indeksində isə aprel ayının ortalarına qədər olan səhm qiymətləri də daxil olmaqla daha aktual məlumatlar nəzərə alınıb. İşgüzar dairələr və istehlakçı inamı göstəriciləri mart ayının sonuna qədər uzanır, xəbər məlumatları isə bu tendensiyanı bu aya qədər əhatə etmək üçün istifadə olunub.

Esvar Prasad bildirib: "Siyasi qeyri-müəyyənlik istehlakçı inamını ciddi şəkildə azaldıb və bu, çox güman ki, biznes investisiyalarına və məşğulluq artımına da mənfi təsir göstərəcək".

Paşa Məmmədli