Məcburi Köçkünlərin Sosial İnkişaf Fondu və "Azərbaycan İcma İnkişafı üzrə Araşdırmalar, Təlim və Resurs Mərkəzi" İctimai Birliyi arasında bağlanacaq layihəyə əsasən, əhalinin geri qayıdışı və hədəf ərazilərdə dayanıqlı icmaların formalaşdırılması istiqamətində reinteqrasiya tədbirləri həyata keçiriləcək.

Valyuta.az xəbər verir ki, layihənin ehtimal olunan dəyəri 3 milyon 611 min 999 manat 46 qəpik təşkil edir.

Təşkil olunacaq tədbirlər çərçivəsində "Böyük Qayıdışa dair I Dövlət Proqramı" haqqında məcburi köçkünlər arasında maarifləndirmə işləri aparılacaq. Bu məqsədlə sorğular keçiriləcək, məlumat bazası yaradılacaq, proqramın coğrafi xəritəsi hazırlanacaq.

Həmçinin təbliğat və təşviqat tədbirləri, icmalar üçün seminarlar və səfərbərlik təlimləri planlaşdırılır. Bu tədbirlərdə "Aktivlər üzrə icma inkişafı" və "Kənd yerlərinin birgə qiymətləndirilməsi" yanaşmalarından istifadə olunacaq.

Layihə çərçivəsində hədəf icmaların ehtiyacları yarı-struktur müsahibələr və müzakirələr yolu ilə müəyyən ediləcək. Nəticədə bu ehtiyacların sosial təsviri, qiymətləndirilməsi və prioritetləşdirilməsi üzrə məlumat bazası formalaşdırılacaq.

İcma iştirakçılığı və gender bərabərliyinə də xüsusi önəm veriləcək. İcma Fəaliyyət Qrupları gender balansı nəzərə alınmaqla formalaşdırılacaq və qadınların layihə fəaliyyətlərinə aktiv cəlbi təmin ediləcək.

Maya Hüseynova