Aprel ayının əvvəlindən bu günə qədər ölkədə vətəndaşların bank kartlarından ümumilikdə 423,081 manat və 655 ABŞ dolları (1 113 manat) oğurlanıb.

"Valyuta.az" 7-20 aprel tarixlərində bank kartlarından oğurlanan məbləğləri bir araya toplayıb.

Oğurluqlar əsasən kiber üsullarla, yəni vətəndaşların aldadılaraq kart məlumatlarını könüllü şəkildə naməlum şəxslərə ötürməsi nəticəsində baş verib.

Kartın üzərindəki CVV/CVC kodu, SMS-lə göndərilən OTP kodu, loqin və şifrələr, eləcə də kartın PİN kodu şəxsi və məxfi məlumatlardır. Bu məlumatlar naməlum şəxslərə verildikdə, bank hesablarındakı vəsaitlər oğurlanır, yaxud şəxsə kredit formasında zərər vurula bilir.

Qeyd olunan müddətdə baş verən kiber oğurluqlar və tarixlər üzrə vəsaitlər aşağıdakı kimidir:

19-20 aprel - 17,804 manat və 60 ABŞ dolları

18 aprel - 21,394 manat

17 aprel - 51,559 manat

16 aprel - 15,040 manat

15 aprel - 32,306 manat

14 aprel - 13,818 manat

12-13 aprel - 41,048 manat

11 aprel - 11,680 manat

10 aprel - 24,864 manat

9 aprel - 39,504 manat və 595 ABŞ dolları

8 aprel - 87,067 manat

7 aprel - 66,997 manat

Mütəxəssislər bildirir ki, onlayn cinayətlər artmaqda davam edir və bu sahədə maariflənmə əsas müdafiə vasitəsidir. Vətəndaşlara şübhəli zənglərə və ya mesajlara cavab verməmək, saxta linklərə daxil olmamaq və şəxsi məlumatları heç bir halda paylaşmamaq tövsiyə olunur.

Qeyd edək ki, bu cinayətlərlə bağlı bəzi şəxslər hüquq-mühafizə orqanları tərəfindən artıq müəyyən edilərək saxlanılıb.

Maya Hüseynova