Pekində keçirilən Yicjuan yarımmarafonunda ilk dəfə olaraq "insanabənzər robotlar" minlərlə insanla birlikdə 21 kilometr məsafədə yarışdılar.

Valyuta.az xəbər verir ki, yarışa "DroidVP" və "Noetix Robotics" kimi Çin istehsalçılarının hazırladığı 21 robot qatıldı. Onlar müxtəlif ölçülərdə olub, bəziləri 1,2 metr, bəziləri isə 1,8 metr hündürlüyə malik idi.

Robotlar insan təlimçilərlə birlikdə iştirak edib, bəzilərinə fiziki dəstək göstərilib. Yarış zamanı bəzi robotlar qaçış ayaqqabısı geyinmiş, birində isə “Qələbə qaçılmazdır” yazılmış baş lent olmuşdur.

Yarışı 2 saat 40 dəqiqə nəticə ilə "Tiangong Ultra" adlı robot qazandı. Bu robot "Pekin İnsanabənzər Robot İnnovasiya Mərkəzi" tərəfindən hazırlanıb. Mərkəzin texniki direktoru Tan Szyan robotun uğurunu onun uzun ayaqlarına və insan qaçışını təqlid edə bilən alqoritminə bağlayıb. Yarış ərzində robotun batareyası üç dəfə dəyişdirilib.

Bəzi robotlar texniki çətinliklərlə üzləşib. Bir robot startda yıxılıb, digəri isə dəmir hasara çırpılaraq operatorunu da yıxıb.