Azərbaycanda mövcud müavinət növlərindən biri də işğaldan azad edilmiş ərazilərdə çalışan şəxslər üçün nəzərdə tutulub.

Valyuta.az Globalinfo.az-a istinadən xəbər verir ki, bu, birdəfəlik müavinətdir və sözügedən ərazilərdə işləyən mütəxəssisə ilkin maddi-məişət şəraitinin dəstəklənməsi məqsədilə verilir.

Müavinətin məbləği 600 manatdır.

Həmin mütəxəssis üç şərtə cavab verməlidir:

Birincisi, peşə, orta ixtisas və ali təhsil haqqında dövlət sənədinə malik olmalıdır. Yəni işçi yalnız orta məktəbi bitiribsə, o zaman işğaldan azad edilmiş ərazilərdə işləyən mütəxəssis sayılmayacaq.

İkincisi, işçinin əmək stajı nəzərə alınır. Onun son 60 ay ərzində (son 5 ildə) fasiləli və ya fasiləsiz ən azı 24 ay əmək stajı olmalıdır.

Üçüncüsü, işçi Azərbaycanın işğaldan azad edilmiş ərazilərində əmək müqaviləsi (kontraktı) əsasında işləyən şəxs olmalıdır.

Necə əldə etmək olar?

Sosial müavinətin təyin olunması üçün şəxs müavinət almaq hüququ yarandıqdan sonra yaşayış yeri üzrə Dövlət Sosial Müdafiə Fondunun (DSMF) struktur bölməsinə, “DOST” mərkəzinə və ya “Şəhid ailələri üzvlərinin, müharibə ilə əlaqədar xəsarət almış hərbi qulluqçuların və əlilliyi müəyyən edilmiş şəxslərin müraciətləri üzrə vahid əlaqələndirmə mərkəzlərinə” müraciət edə bilər.

Nə zaman təyin olunur?

Müavinətin təyin olunması barədə müraciətə qeydə alındığı gündən ən geci 10 gün müddətində baxılır və müvafiq qərar qəbul edilir. İmtina edilməsi barədə qərar qəbul edildikdə isə, 5 gün müddətində səbəbləri göstərilməklə, müraciət edən şəxsə rəsmi məlumat verilir.

Bundan əlavə, müraciət edən şəxsin bu qərardan inzibati qaydada yuxarı səlahiyyətli orqana (vəzifəli şəxsə) və məhkəməyə şikayət etmək hüququ var.

Hazırda bu müavinət hər hansı bir dövlət qurumuna müraciət edilmədən, hər hansı bir sənəd təqdim edilmədən proaktiv qaydada təyin edilir.

Qeyd edək ki, müavinət almaq hüququ olanlar – Azərbaycan vətəndaşları, əcnəbilər və ölkədə daimi yaşayan vətəndaşlığı olmayan şəxslərdir.