"Azərişıq" ASC-nin növbəti çoxmilyonluq tenderinə yekun vurulub.

Valyuta.Az xəbər verir ki, bu dəfə ASC-nin tenderinin qalibi olan şirkətə 8.4 milyon manat ödənəcək. 

Məlumata əsasən, Baki şəhəri, Sabunçu və Xətai rayonlarının paylayıcı elektrik şəbəkələrində enerji təchizatının dayanıqlığının artırılmasi məqsədilə müvafiq işlər görüləcək.

Sadalanan işlərin görülməsi ASC tərəfindən "İntegras" Məhdud Məsuliyyətli Cəmiyyətinə həvalə ediləcək.

Tərəflər arasında imzalanacaq müqavilənin dəyəri 8.433.238,14 AZN-dir. 

Qeyd edək ki, "İntegras" MMC 50 AZN nizamnamə kapitalına sahibdir. Şirkətin qanuni təmsilçisi isə Həsənova Məhsəti Hüseynalı qızıdır.

Onun haqqında isə açıq mənbələrdə heç bir məlumata rast gəlinmir.

2017-ci ildə dövlət qeydiyyatına alınan şirkət tez-tez "Azərişıq" ASC-nin tenderlərinin qalibi seçilib. 

Belə ki, 2022-ci ildən bəri tərəflər arasında ümumi dəyəri 19 milyon manatdan çox olan 8 satınalma müqaviləsi imzalanıb. 

Təkcə ötən il "İntegras" MMC "Azərişıq" MMC-nin ümumi dəyəri 9 milyon manatdan çox olan bir sıra tenderlərinin qalibi seçilib.