Almaniya getdikcə daha dərin böhrana doğru sürüklənir. Federal hökumətin İqtisadi Ekspertlər Şurasının yeni hesabatına görə, ölkənin iqtisadiyyatı bu il də böyüməyəcək. Belə olarsa, bu, üçüncü ardıcıl il statqasiya (iqtisadi durğunluq) qeydə alınacaq.

Valyuta.az xəbər verir ki, "Bild" qəzeti İqtisadi Ekspertlər Şurasının üzvü professor Veronika Qrimmlə Almaniyanın iqtisadi gələcəyi haqqında danışıb. Müsahibənin əsas məqamları belədir:

Böhranın səbəbləri haqqında

"İllərdir real qərarlardan qaçırıq. Merkel hökuməti dövründə heç nəyi dəyişdirməmək üçün bütün "sülh dividendlər"ini xərclədik. Pandemiyanın başlanğıcından bəri hərəkət imkanlarını genişləndirmək üçün davamlı olaraq kredit götürdük. Amma bu, sonsuz davam edə bilməz".

Almaniyada əmək haqqı vəziyyəti haqqında

"Almaniyada xalis əmək haqqının azalacağından qorxuram - ümumi vəziyyət daha çətinləşə bilər. Xoşagəlməz tendensiyalar görəcəyik: sənayedə daha az iş yeri və aşağı əmək haqqı olan sektorlarda artım. Bununla mübarizə aparılmalıdır. Siyasət cəlbedici şərait yaratmalıdır - məsələn, süni intellekt və rəqəmsallaşmanı inkişaf etdirməklə".

Minimum əmək haqqı haqqında

"2026-cı ildə minimum əmək haqqını saatda 15 avroya qaldırmazdım. Əgər əmək məhsuldarlığının aşağı olduğu bir vəziyyətdə yenidən bütün əmək haqqı strukturunu yuxarı çəksək, rəqabət qabiliyyətimizi itirərik. Bu, iqtisadiyyata zərbə vuracaq".

Pensiya yaşı haqqında

"Pensiyalar ilə bağlı qərarlar çoxdan məlumdur: tədricən pensiya yaşını artırmaq və onu gözlənilən ömür uzunluğu ilə əlaqələndirmək. Bu, dərhal 70-ə qədər demək deyil. Məsələn, səkkiz il ərzində 68-ə çatmaq olar. Həmçinin, mövcud pensiyaları əmək haqlarına deyil, inflyasiyaya uyğun indeksləşdirmək də kiçik bir təsir göstərərdi".

İş yerləri haqqında

"İqtisadiyyat təzyiq altındadır. İşçi sayı azalır – həmişə işdən çıxarma yolu ilə deyil, yeni işçi qəbul etməməklə də. Artıq görürük ki, sənayedə məşğulluq azalır, sağlamlıq və dövlət sektorunda isə artır. Bu, sağlam deyil. Bu sahələrdə prosesləri avtomatlaşdırmaq lazımdır ki, kadr ehtiyacı azalsın".

Nəticə: Almaniyanın iqtisadi problemləri uzun müddətdir qaçırdığı struktur islahatları və məhsuldarlıq çatışmazlığı ilə bağlıdır. Ekspertlərin tövsiyələri arasında rəqəmsal transformasiya, əmək bazarında dəyişikliklər və pensiya sisteminin yenidən nəzərdən keçirilməsi durur.

Paşa Məmmədli