2025-ci ilin yanvar-mart aylarında əhaliyə göstərilən ödənişli xidmətlərin dəyəri 3 milyard 334 milyon manat təşkil edib.

"Valyuta.az" statistik mənbələrə istinadən xəbər verir ki, bu göstərici 2024-cü ilin eyni dövrü ilə müqayisədə real ifadədə 9,4% artım deməkdir. Ötən ilin yanvar-mart aylarında bu sahə üzrə dövriyyə 2 milyard 828 milyon manat olub. Beləliklə, əhalinin ödənişli xidmətlərə yönəltdiyi vəsait 506 milyon manat artıb.

Statistikaya əsasən, hüquqi şəxslər tərəfindən əhaliyə 2 milyard 530 milyon manat dəyərində xidmət göstərilib ki, bu da ümumi xidmətlərin 75,9%-ni təşkil edib.

Cari ilin yanvar-mart aylarında hər bir ölkə sakini orta hesabla 326 manatlıq müxtəlif ödənişli xidmətlərdən istifadə edib. Bu göstərici ötən ilin eyni dövründə 277,6 manat olub. Beləliklə, adambaşına xidmət xərclərində 48,4 manat artım müşahidə edilib ki, bu da nominal ifadədə təxminən 17,4% artım deməkdir.

Sərvanə Rəmixanova