Alış-veriş təkcə məhsul seçimi və ödənişdən ibarət deyil. Bu prosesdə alıcı və satıcı arasında qurulan münasibət də xüsusi yer tutur. Bəzən bu münasibət xoş bir təcrübə yaradır, bəzən isə fərqli hisslər doğurur. Hər qarşılıqlı ünsiyyətin öz havası və dinamikası olur. Xüsusilə müəyyən məkanlarda bu münasibətlər daha çox diqqət çəkir. Məsələn, bəzi satıcılar alıcıları xoş qarşılayarkən, bəzi satıcılar alçaldıcı baxışlarla qarşılaya bilir. Bu, şəxsi keyfiyyətdir, yoxsa bu davranışların arxasında gizlənən məqsəd varmı?

Valyuta.az xəbər verir ki, bu barədə “Yukhulu” geyim mağazasının təsisçisi Nigar Xəlilova məlumat verib: “Təsəvvür edin ki, lüks bir markası olan bir mağazaya daxil olmusunuz. İnteryeri, kolleksiyası gözəldir, amma satıcıların sizə olan baxışları sizi qıcıqlandırır. Siz düşünürsünüz ki, bu satıcının şəxsi keyfiyyətidir. Əslində, bu belə deyil. Bu, lüks markaların marketinqidir, bir xüsusi strategiyadır. Yəni, o satıcılara belə olmağı, bu və bu kimi reaksiya verməyi öyrədirlər. Çünki onların yuxardan aşağı, xoşagəlməz baxışlarnı görəndə siz istər-istəməz hərəkətə keçirsiniz, özünüzü isbat etməyə çalışırsınız. Bu situasiya manipulyativ şəkildə sizə nə isə almağa sövq edir. Siz o lüks markadan nə isə alaraq həm özünüzə, həm də o satıcıya sübut etməyə çalışırsınız ki, siz də bu lüks dünyaya aidsiniz".      

N.Xəlilova deyir ki, bu kimi situasiyalarla qarşılaşanda, reaksiyalar fərqli ola bilir: “Bu situasiya ilə mənim yaxınım da qarşılaşmışdı. Belə ki, evinin təmiri dönəmində çox sadə bir geyimdə lüks bir markanın mağazasına daxil olub. Satıcının alçaldıcı baxışları ilə qarşılaşıb və çantasında olan təmirə aid puldan götürərək 550 manata "yay ayaqqabısı" alıb. Təbii ki, sonradan peşman olub. Buradan belə nəticə çıxarmaq olar ki, nə qədər çox alçalma hiss ediriksə, o qədər çox almağa meyilli oluruq. Yəni, çox alçalma çox almaq istəyi yaradır”.

Sərvanə Rəmixanova