Azərbaycanın iki bölgəsində - Gəncə və Qəbələdə Olimpiya İdman Komplekslərinin tikintisinə start verilib.

Valyuta.az-ın məlumatına görə, Gənclər və İdman Nazirliyi artıq tikinti işləri üçün podratçı şirkətlərlə müqavilə bağlayıb.

Layihəyə əsasən, Gəncə Olimpiya İdman Kompleksinin inşasını “Modern Construction” MMC həyata keçirəcək. Bu işin ümumi dəyəri 8,3 milyon manat təşkil edir. Qəbələdə inşa ediləcək kompleks isə “The Best Constructions” MMC-yə həvalə olunub və layihənin dəyəri 7,3 milyon manatdır.

Beləliklə, iki iri idman kompleksinin tikintisi üçün dövlət tərəfindən ümumilikdə 15,6 milyon manat vəsait ayrılıb.

Bu təşəbbüs, bölgələrdə idmanın inkişafına və gənclərin sağlam həyat tərzinə təşviqinə xidmət edən mühüm addım kimi qiymətləndirilir.

Qeyd edək ki, Gəncə Olimpiya İdman Kompleksinin birinci korpusu 2002-ci, ikinci korpusu isə 2006-cı ildə istifadəyə verilib. Ümumi sahəsi 1,9 hektar olan idman mərkəzində 900 nəfərlik əsas idman zalı (48x22 m) və 220 nəfərlik güləş zalı (32x22 m) fəaliyyət göstərir. Burada ölçüsü 25x15 metr olan, 120 nəfərlik tamaşaçı tutumuna malik örtülü üzgüçülük hovuzu da mövcuddur.

Qəbələ Olimpiya İdman Kompleksi isə 6 yanvar 2012-ci ildən fəaliyyət göstərir. Ümumi ərazisi 4,3 hektar olan kompleksdə 744 nəfərlik universal idman zalı, üzgüçülük hovuzu və 2 fitnes zalı mövcuddur. Kompleksdə həmçinin 40 nəfərlik yeməkxana, 1409 nəfərlik futbol stadionu, basketbol və minifutbol meydançaları fəaliyyət göstərir. Ərazidə idmançılar üçün 9 otaqlı, 30 nəfərlik 3 kotec də yerləşir.