Asiya İnkişaf Bankı 2026-cı ilə qədər Azərbaycanın büdcə kəsirinin azalmasını proqnozlaşdırır. Azərbaycanın dövlət büdcəsinin kəsiri 2026-cı ildə ümumi daxili məhsulun (ÜDM) 2%-nə qədər enəcək. Cari ildə büdcə kəsirinin ölkənin ÜDM-nin 2.4%-ni təşkil edəcəyi gözlənilir. 

2024-cü ilin yekunlarına görə isə dövlət büdcəsinin kəsiri ÜDM-in 0.0004 %-ni təşkil edib, bu ilin yanvar-fevral aylarında isə dövlət büdcəsinin profisiti ÜDM-in 7.2%-nə çatıb.
 
AİB-in bu proqnozu hansı iqtisadi faktorlar əsasında formalaşıb? Azərbaycanda büdcə kəsirinin azalması hansı sahələrə daha çox təsir göstərə bilər?

Valyuta.az-ın suallarını cavablandıran iqtisadçı Eyyub Kərimlinin sözlərinə görə, 2026-cı ildə büdcə kəsirinin azalması bir neçə parametrlərlə bağlı ola bilər:

“Bu, ilk olaraq neft-qaz qiymətlərində sabitliklə, qeyri-neft sektorunun inkişafı, vergi gəlirlərinin artımı ilə bağlı ola bilər. Bundan başqa, iqtisadiyyatın diverfikasiyası, neft gəlirlərindən asılılığın yaşıl enerji ilə kompensasiya edilməsi büdcə gəlirlərinin müəyyən artımına və büdcə kıəsirinin azalmasına səbəb olacaq. Büdcə kəsirinin azalması vergidən və digər daxil olmalardan artım hesabına baş verəcək”. 

İqtisadçı hesab edir ki, dövlət xərclərinin optimallaşdırılması, şəffaflaşdırılması, büdcə xərclərinin daha səmərəli istifadə edilməsi də buna öz müsbət təsirini göstərəcək:

“Nəticə olaraq büdcə kəsirinin azalması ölkə iqtisadiyyatının müxtəlif sahələrinə müsbət təsir göstərəcək. Bu həm sosial layihələrin vaxtında, keyfiyyətli icra edilməsi, investorların cəlb edilməsi, iqtisadi dinamikanın artırılmasını, xarici borclanmanın azalmasını, ölkə valyutasının, pul-kredit siyasətinin sabitliyini təmin etmiş olacaq”. 

Günay