Neft bazarlarında son saatlar ərzində müşahidə olunan dalğalanmalar qiymətlərə ciddi təsir göstərib. Londonun ICE birjasında 2025-ci ilin iyun ayı tədarükü üzrə "Brent" markalı neft füçersləri 25 mart 2021-ci ildən bəri ilk dəfə bir barel üçün 61 dollar səviyyəsindən aşağı ticarət olunub.

Valyuta.az-ın ticarət platformalarından əldə etdiyi məlumata görə, Bakı vaxtı ilə saat 04:00-da "Brent"in qiyməti 5.39% azalaraq 60.89 dollara enib. Təxminən yarım saat sonra isə qiymət azalma tempini bir qədər zəiflədərək 60.98 dollar səviyyəsində stabilləşib (azalma 5.25%).

Qeyd edək ki, gecə saat 01:18-də "Brent"in iyun füçersləri 3.79% dəyər itirərək 61.78 dollar səviyyəsinə düşmüşdü. Bu, 2021-ci ilin aprelindən bəri ən aşağı göstəricidir.

Eyni zamanda, may ayı tədarükü ilə WTI markalı neftin qiymətində də 6.52%-lik geriləmə qeydə alınıb – bu markalı neft hazırda bir barel üçün 57.54 dollardan ticarət olunur.

Qiymətlərdəki bu kəskin enmənin əsas səbəbi kimi ABŞ və Çin arasında ticarət gərginliyinin artması göstərilir.