Azərbaycanda elektromobil sahiblərinin işini asanlaşdıracaq yeni mobil tətbiq istifadəyə verilib.

Valyuta.Az xəbər verir ki, “TOKAZ” adlı platforma elektrikli avtomobil sürücülərinə avtomobillərini sürətli və rahat şəkildə şarj etməyə imkan verir. Tətbiq vasitəsilə istifadəçilər xəritədə ən yaxın enerjidoldurma stansiyalarını tapır, onları öncədən rezerv edir və enerji sərfiyyatı ilə bağlı hesabatlar əldə edə bilirlər.

Tətbiqin interfeysi vasitəsilə şarj prosesi real vaxtda izlənə, avtomobilin enerji səviyyəsi idarə oluna bilər. Bu da sürücülərə həm vaxt, həm də resurs baxımından üstünlük qazandırır.

Layihənin müəllifi Sərdar Əsədov bildirib ki, “TOKAZ” mobil tətbiqinin əsas məqsədi karbon emissiyalarını azaltmaq və ətraf mühitin qorunmasına töhfə verməkdir:
“Yaşıllaşan dünyaya dəstək vermək istəyirik. Startap şəhadətnaməsi almağımız isə bizi daha böyük planlara motivasiya edir. Ən əsası isə komandamıza əlavə dəstək və vergi güzəştləri bu planları reallaşdırmaqda əhəmiyyətli rol oynayır.”

Qeyd edək ki, tətbiq Kiçik və Orta Biznesin İnkişafı Agentliyində (KOBİA) yaradılmış Ekspertlər Şurasının qərarı ilə “Startap” şəhadətnaməsi əldə edib. Bu sənəd layihəyə vergi güzəştləri və inkişaf üçün əlverişli şərait təmin edir.