İtaliya rəqabət orqanı məşhur Roma Kolizeyinə bilet satışında manipulyasiya və süni məhdudiyyətlər yaratdıqlarına görə bir bilet satış şirkəti və altı turizm operatoruna 20 milyon avro məbləğində cərimə tətbiq edib. 

Valyuta.az xəbər verir ki, bilet alışı ilə bağlı şikayətlər fonunda başlanan araşdırma, ölkənin ən məşhur tarixi abidəsinə çıxışın necə məhdudlaşdırıldığını ortaya qoyub.

İtaliyanın Rəqabət və Bazarlar üzrə Qurumunun (AGCM) 7 aprel 2025-ci il tarixində verdiyi açıqlamada qeyd olunur ki, cərimələnənlər arasında Kolizeyə rəsmi bilet satışını 1997–2024-cü illər arasında həyata keçirən "CoopCulture" şirkəti də var. Bu şirkət 7 milyon avro cərimələnib. Səbəb isə avtomatik bilet yığımı və bu biletlərin öz tur paketləri üçün kütləvi şəkildə saxlanılmasına qarşı lazımi tədbirlərin görülməməsidir.

Rəqabət qurumu bildirir ki, şirkətin bu davranışı, İtaliyanın ən çox ziyarət edilən turistik məkanına standart qiymətə bilet almağın “əhəmiyyətli və davamlı şəkildə mümkünsüz” olmasına səbəb olub. Beləliklə, turistlər ya çox əvvəlcədən rezervasiya etməyə, ya da əlavə xidmətlərlə birlikdə daha bahalı bilet paketləri almağa məcbur qalıblar.

AGCM həmçinin altı beynəlxalq turizm operatorunu – "Tiqets International B.V.", "GetYourGuide Deutschland GmbH", "Walks LLC", "Italy With Family S.r.l.", "City Wonders Limited" və "Musement S.p.A." – proqramlaşdırılmış robotlar (botlar) vasitəsilə biletləri kütləvi şəkildə əldə edib, daha sonra onları ekskursiyalar və ya prioritet giriş kimi əlavə xidmətlərlə birgə daha baha qiymətə satdıqları üçün cərimələyib. Bu fəaliyyətlər nəticəsində rəsmi vebsayt – "CoopCulture"da biletlər sürətlə tükənib.

Qeyd olunur ki, bu araşdırma 2023-cü ilin iyul ayında, istehlakçılar tərəfindən rəsmi qiymətlərlə onlayn bilet almanın demək olar ki, mümkünsüzlüyü ilə bağlı çoxsaylı şikayətlərdən sonra başladılıb.

Bildirildiyinə görə, 2025-ci ildə Roma "Yubiley 2025" adlı mühüm dini tədbiri qeyd edir. Bu səbəbdən də, Avropanın ən çox turist cəlb edən şəhərlərindən biri olan Roma bu il daha da sıx olacaq. Belə şəraitdə Kolizey kimi məşhur məkanlara giriş üçün biletləri aylar öncədən bron etmək və uzun növbələrə hazır olmaq tələb olunacaq.

Paşa Məmmədli