Cəbrayıl rayonunda yerləşən “Araz Vadisi İqtisadi Zonası” Sənaye Parkında smart televizorların istehsalını nəzərdə tutan yeni layihəyə start verilir. “Taube Electronics” MMC bu məqsədlə parkın rezidenti statusu qazanıb və müəssisəyə 3,5 milyon manatlıq investisiya yatırmağı planlaşdırır.

Valyuta.az xəbər verir ki, bu barədə İZİA-nın mətbuat katibi Elçin Kazımlı məlumat verib.

Layihənin icrası nəticəsində ilkin mərhələdə 20-yə yaxın daimi iş yerinin açılması nəzərdə tutulur. Zavodda istifadə olunacaq texnologiyalar əsasən Çin istehsalı olan qabaqcıl həllərə əsaslanacaq. İllik istehsal gücü 19 500 ədəd olan müəssisədə 32, 43, 50 və 55 düym ölçülərində smart televizorların istehsalı planlaşdırılıb.

Qeyd edək ki, “Araz Vadisi İqtisadi Zonası” 2021-ci il oktyabrın 4-də Prezidentin müvafiq Fərmanı ilə yaradılıb. Ümumi sahəsi 200 hektar olan sənaye parkında bu günə qədər 17 sahibkarlıq subyekti rezident, 3 şirkət isə qeyri-rezident kimi fəaliyyətə qoşulub. İndiyə qədər bölgəyə 30 milyon manatdan artıq investisiya yatırılıb və təxminən 100 daimi iş yeri formalaşdırılıb.