ABŞ-ın texnologiya şirkəti "Microsoft" süni intellekt sahəsində bacarıqlarını inkişaf etdirmək istəyən şəxslər üçün "AI Skills Fest" adlı yeni tədris proqramını istifadəyə verib. 

Valyuta.az xəbər verir ki, 28 may 2025-ci il tarixinə qədər davam edəcək proqram tamamilə pulsuzdur və istənilən şəxs qeydiyyatdan keçərək iştirak edə bilər.

Belə ki, proqram çərçivəsində canlı yayımlar, əyani təlimlər, maarifləndirici videolar və.s tədbirlər keçiriləcək. Təlimlər süni intellekt sahəsinə yeni başlayanlar üçün nəzərdə tutulub və  "Microsoft Copilot", "Fabric" və "Azure" kimi platformaları əhatə edir.

Nəzərə çatdıraq ki, təlimləri tamamlayan bəzi iştirakçılar üçün pulsuz sertifikat təqdim olunacaq. Bunun üçün xüsusi qeydiyyat və seçim (çəkiliş) sistemi tətbiq ediləcək. Digər iştirakçılar isə sertifikatı ödənişli şəkildə əldə edə biləcəklər.

Qeyd edək ki, "Microsoft" bu təşəbbüslə yanaşı, “24 saat ərzində onlayn çoxsəviyyəli süni intellekt dərsini tamamlayan ən çox istifadəçi” kateqoriyası üzrə "Guinness" dünya rekordunu qırmağı da hədəfləyir. Rekord cəhdinə artıq start verilib.

Sərvanə Rəmixanova