"Goldman Sachs" investisiya bankı 2026-cı il üçün Brent və WTI markalı xam neftin orta illik qiymət proqnozunu yenidən aşağı salıb.

Valyuta.az xəbər verir ki, bank bu qərarı artan tənəzzül riskləri və "OPEC+" ölkələrindən gözləniləndən artıq təklif ehtimalı ilə izah edib.

6 aprel tarixli qeyddə bank Brent markalı neftin 2026-cı ildə orta qiymət proqnozunu 4 dollar azaldaraq 58 dollar barelə, WTI üçün isə 55 dollar barelə endirib. Bu, bankın bir neçə gün əvvəl verdiyi 62 və 59 dollarlıq ilkin proqnozdan da aşağıdır.

Bank 2025-ci ildə neftə gündəlik tələbatın 300 min barel, 2026-cı ildə isə 400 min barel artacağını proqnozlaşdırır. Lakin əvvəlki proqnozlarda bu rəqəm 600 min barel idi. Tələbat artımının azaldılması ümumi daxili məhsulun zəifləməsi ilə əlaqələndirilir.

"Goldman Sachs" əlavə edib ki, ABŞ administrasiyası tarif siyasətini dəyişsə və bazarlara inamverici mesajlar versə, neft qiymətləri bu proqnozları üstələyə bilər.

Qeyd edək ki, bazar ertəsi neft qiymətləri bir qədər də ucuzlaşaraq son dörd ilin ən aşağı səviyyəsinə düşüb. Bu azalma ABŞ və Çin arasında artan ticarət gərginliyinin qlobal iqtisadiyyata mənfi təsiri ilə əlaqələndirilir.

Sərvanə Rəmixanova