ABŞ hökuməti "Apple" və "Google" şirkətlərinə "TikTok" tətbiqini mağazalarında saxlamağa 75 günlük əlavə vaxt verib.

Valyuta.az xəbər verir ki, bu qərar, "ByteDance" şirkətinə tətbiqi amerikalı investorların nəzarətində olacaq yeni bir şirkətə satması üçün verilmiş müddətin uzadılması ilə bağlıdır. 

Xatırladaq ki, ABŞ prezidenti Donald Tramp əvvəllər "TikTok"un ya satılması, ya da ölkədə qadağan edilməsi üçün 5 aprel tarixini son möhlət kimi təyin etmişdi, lakin bu tarix indi 18 iyuna qədər uzadılıb.

Məlumata görə, tərəflər arasında razılaşma yekunlaşmaq üzrədir. Yaranacaq "TikTok America" adlı şirkətdə "Andreessen Horowitz", "Blackstone" və "Oracle" kimi amerikalı nəhənglər yer alacaq. Yeni qurumda "ByteDance" 20% payla təmsil olunacaq, ABŞ-dan olan mövcud investorlar 30%, yeni investorlar isə 50% paya sahib olacaq.

Qeyd edək ki, ABŞ uzun müddətdir ki, "TikTok" istifadəçilərinin məlumatlarının Çindəki serverlərdə saxlanmasından narahatdır. Hökumət bu məlumatlara Çin hökumətinin çıxış əldə edə biləcəyindən ehtiyat edir. Həm Tramp, həm də Bayden administrasiyası bu təhlükəni ciddi qəbul edir.

Sərvanə Rəmixanova