"Meta" şirkəti süni intellekt sahəsində növbəti böyük addımını ataraq "Llama 4" model ailəsini təqdim edib.

Valyuta.az xəbər verir ki, yeni seriyaya artıq istifadəyə verilmiş "Llama 4 Scout" və "Llama 4 Maverick", eləcə də hələ hazırlanmaqda olan super güclü "Llama 4 Behemoth" modeli daxildir. Bu modellər "Meta AI" köməkçisini gücləndirərək WhatsApp, Messenger, Instagram və veb platformalarda 40 ölkədə aktivləşdirilib.

Yeni nəsil “Llama 4” modelləri "Meta"nın ilk dəfə istifadə etdiyi "ekspertlərin qarışığı" adlı texnologiya ilə hazırlanıb. Bu sistem sayəsində modellər tapşırıqları alt hissələrə bölür və daha dəqiq, sürətli cavablar verir. 

“Llama 4-ün” əsas fərqləri 

Scout – uzun mətnləri, sənədləri və kod bazalarını rahat anlayır.

Maverick – çoxdilli tapşırıqlar və yaradıcı yazılar üçün idealdır.

Behemoth – gələcəkdə təqdim ediləcək və elmi-texniki sahədə ən güclü modellərdən biri olacaq.

Meta həmçinin bildirib ki, bu modellər "GPT-4o" və "Gemini 2.0" kimi qabaqcıl modellərlə bəzi hallarda rəqabət apara bilir. Lakin bəzi lisenziya məhdudiyyətləri də var: Avropa İttifaqında istifadəsi qadağandır və 700 milyondan çox istifadəçisi olan şirkətlər xüsusi icazə ilə istifadə edə bilər.

Qeyd edək ki, "Meta" “Llama 4” modelləri və gələcək planları barədə daha ətraflı məlumatı 29 apreldə keçiriləcək LlamaCon tədbirində açıqlayacaq.

Sərvanə Rəmixanova