Milyarder iş adamı Uorren Baffetin sahibi olduğu "Berkshire Hathaway" bu il təxminən 9 faiz artımla tarixi bazar çöküşünü geridə qoymağı bacarıb.

Valyuta.az xəbər verir ki, ABŞ prezidenti Donald Trampın aqressiv gömrük tarifləri "Wall Street"i silkələyərkən, investorlar nağd vəsaitlə zəngin olan bu holdinqə sığınaraq, bazarın ən çətin dövründə belə "S&P 500" göstəricisindən daha yaxşı nəticə göstərən "Berkshire Hathaway"ə üstünlük veriblər.

"Geico" sığorta şirkəti və "BNSF Railway" də daxil olmaqla, Omaha mərkəzli ana şirkətin B kateqoriyalı səhmləri ötən həftə 6,2 faiz dəyər itirib. Bu, "S&P 500"ün 9,1 faizlik və texnologiya yönümlü "Nasdaq Composite"in 10 faizlik enişi ilə müqayisədə daha az itki deməkdir. İri istehsalat, enerji və pərakəndə bizneslərinə sahib olan və daxili bazara yönəlmiş "Berkshire" bu il hələ də təxminən 8 faiz yüksəlib.

"Evercore ISI" analitik şirkətinin texniki təhlil rəhbəri Riç Rossun sözlərinə görə, bu səhmlər eyni zamanda "S&P 500"də yer alan ilk 10 şirkət arasında 200 günlük hərəkətli ortalamanın üzərində ticarət edilən yeganə səhmdir. Ross bildirib: "200 günlük hərəkətli ortalama hər şey olmasa da, mühüm bir göstəricidir və BRK/B bu səviyyənin üzərində olan ‘ilk 10’ səhmlər içində tək qalıb".

Qlobal ticarət müharibəsi başlatmağa yönəlmiş şok hərəkətləri ilə Tramp iqtisadi perspektivləri sarsıtdığı bir dövrdə "Berkshire Hathaway" daha yaxşı performans göstərib. Bu addımlar nəticəsində birja ciddi eniş yaşayıb və "S&P 500" cəmi iki seansda 10 faiz dəyər itirib.

"Dow Jones Industrial Average" tarixdə ilk dəfə ardıcıl iki gündə 1500 bənddən çox itki ilə üzləşib. Daha təhlükəsiz investisiya məkanları axtaran bəzi investorlar "Berkshire"i həm bu nəhəng sığorta imperiyasının müdafiə xarakterli quruluşuna, həm də 2024-cü ilin sonuna qədər 334 milyard dollarlıq nağd vəsait ehtiyatına görə cəlbedici hesab edirlər.

"Ritholtz Wealth Management" şirkətinin baş direktoru Coş Braun bildirib ki, "Berkshire" hazırda bazarda gələcəyini Trampın gözlənilməz siyasətindən asılı etməyən azsaylı səhmlərdən biridir.

Braun əlavə edib: "Dünyanın ən böyük açıq səhmdar şirkətlərindən biri olan bu qurum ABŞ iqtisadiyyatı ilə sıx bağlıdır. Bazar artıq başa düşür ki, bəzi şirkətlər Ağ Evə əsaslanmır, 10 illik xəzinə faizlərinin harada yerləşməsinə, Çinin növbəti addımlarına və ya kanadalıların nə düşündüyünə bağlı olmadan fəaliyyət göstərir və inkişaf edir".

94 yaşlı Uorren Baffet cümə günü sosial şəbəkədə onun adından yayılan bəyanatları təkzib edib. Bu təkzib, prezident Trampın "Truth Social" platformasında Baffetin dəstəyi ilə yayımlandığı iddia edilən və prezidentin birjanı qəsdən endirdiyini göstərən pərəstişkar videosunu paylaşmasından sonra gəlib. Baffet bildirib ki, "Berkshire"ın 3 mayda keçiriləcək illik toplantısına qədər nə bazarlar, nə də gömrük tarifləri barədə heç bir şərh verməyəcək.

Paşa Məmmədli