Birləşmiş Ştatlarda gömrük rüsumları ilə bağlı narahatlıqlar fond bazarını sarsıdıb. 

Valyuta.az xəbər verir ki, "Pacific Investment Management Co."nun həmtəsisçisi və keçmiş investisiya direktoru Bill Qross cümə axşamı "S&P 500" indeksinin 4%-dən çox ucuzlaşmasına səbəb olan satışları "çətin həll olunan dərin bazar hadisəsi" kimi qiymətləndirib.

O, elektron poçt vasitəsilə verdiyi açıqlamada deyib: "İnvestorlar "düşən bıçağı tutmağa" çalışmamalıdır. Bu, 1971-ci ildə qızıl standartının ləğvinə bənzəyir, lakin dərhal mənfi nəticələri olan epik iqtisadi və bazar hadisəsidir".

ABŞ prezidenti Donald Tramp çərşənbə günü ölkəyə ixracat edən şirkətlərə ən azı 10% gömrük rüsumu tətbiq edəcəyini elan edib. Ən diqqətçəkən tariflər arasında Avropa İttifaqı üçün 20%, Yaponiya üçün 24% rüsum nəzərdə tutulub, Çin isə daha yüksək tariflə üzləşəcək. Bazar reaksiyası nəticəsində "S&P 500" indeksindən təxminən 2 trilyon dollar silinib və dövlət istiqrazlarının gəlirliliyi qısamüddətli olaraq 4%-dən aşağı düşüb.

İqtisadçılar hesab edirlər ki, Trampın addımları qısamüddətdə ABŞ-da qiymətlərin artmasına və iqtisadi artımın yavaşlamasına, hətta tənəzzülə səbəb ola bilər. Prezident gömrük tariflərini ölkənin gücünü nümayiş etdirmək, daxili istehsalı stimullaşdırmaq və geosiyasi güzəştlər əldə etmək üçün bir vasitə kimi görür.

Qross Trampın geri çəkilmək ehtimalının az olduğunu vurğulayaraq deyib: "Bunun üçün o, çox sərtdir".

O, hazırda yalnız "AT&T Inc." və "Verizon Communications Inc." kimi faiz dərəcələrinin aşağı düşdüyü mühitdə nisbətən etibarlı dividend gəliri təklif edən yerli şirkətlərdə imkanlar gördüyünü bildirib. Hər iki şirkətin səhmləri Nyu-York vaxtı ilə saat 14:51-də artım göstərirdi. Lakin Qross investorları burada da ehtiyatlı olmağa çağırıb: "Bunlar da "həddindən artıq alım" zonasına yaxınlaşır".

Paşa Məmmədli