Azərbaycanda dövlət dəstəyi ilə tətbiq edilən aqrar sığorta sistemi çərçivəsində fermerlərə ödənilən kompensasiyalar əhəmiyyətli dərəcədə artıb.

Valyuta.az Aqrar Sığorta Fonduna istinadən xəbər verir ki, 2024-cü ildə meyvə bağlarına dəyən zərərlərə görə fermerlərə ümumilikdə 721 min manat sığorta ödənişi verilib.

Bu, 2023-cü illə müqayisədə 18 dəfə çoxdur. Ötən il bu məbləğ cəmi 39 min manat təşkil edib.

Meyvə bağlarına dəyən zərərlərin kompensasiyası əsasən fırtına, dolu və şaxtavurma kimi hadisələrlə bağlı olub. Xüsusilə, şaxtavurma səbəbilə təkcə 2024-cü ildə 130 min manat ödəniş həyata keçirilib. Bu sığorta mexanizmindən faydalanan təsərrüfat sahibləri ölkənin bütün iqtisadi regionlarını əhatə edib. Ən çox kompensasiya üzüm, gilas, alma, badam, ərik, alça, armud, şaftalı, qoz, limon, naringi, nektarin, xurma kimi məhsullara görə ödənilib.

Ümumilikdə, 2024-cü ildə aqrar sığorta sistemindən yararlanan fermerlərə 6,4 milyon manat həcmində ödəniş verilib ki, bu da ötən illə müqayisədə 2 milyon manat çoxdur. 

Maya Hüseynova