"Goldman Sachs Group" yaxın 12 ayda ABŞ iqtisadiyyatında tənəzzül ehtimalı ilə bağlı təxminini 20%-dən 35%-ə yüksəldib. 

Valyuta.az xəbər verir ki, bu barədə “The Wall Street Journal” məlumat yayıb.

Qeyd olunur ki, ölkə prezidenti Donald Trampın administrasiyası tərəfindən yaxın günlərdə planlaşdırılan yeni idxal rüsumlarının tətbiqi qlobal ticarət müharibəsinin kəskinləşməsinə səbəb olacaq. "Goldman Sachs" analitiklərinin fikrincə, bu, ABŞ-da inflyasiyanın səviyyəsinin artmasına səbəb olacaq.

"Bununla əlaqədar olaraq, bank iqtisadiyyatda tənəzzül ehtimalı ilə bağlı qiymətləndirməsini demək olar ki, iki dəfə artırıb", deyə nəşr yazır.

"Goldman Sachs Group" analitikləri qeyd edirlər ki, proqnoz təxminindəki artım aşağı artım bazası, ev təsərrüfatlarına və biznesə inamın nəzərəçarpacaq dərəcədə azalması, həmçinin ABŞ administrasiyasının rəsmilərinin öz siyasətlərini həyata keçirmək üçün qısamüddətli iqtisadi zəifliyə dözməyə hazır olduqlarını göstərən bəyanatları ilə bağlıdır.

Bundan əlavə, əmək bazarındakı problemlər və mümkün qrip epidemiyaları ilə bağlı risklərin iqtisadi artıma təzyiq göstərə biləcəyi iddia edilir.

Paşa Məmmədli