Avropanın ən böyük aşağıbüdcəli aviaşirkəti olan "Ryanair"in sərnişinləri 2025-ci ilin yayında aviabiletləri keçən illə müqayisədə daha yüksək tariflərlə almalı olacaqlar. Qiymət dəyişiklikləri isə geosiyasi hadisələrdən asılı ola bilər.

Valyuta.az xəbər verir ki, bu barədə "Ryanair"in baş icraçı direktoru Maykl O'Liri "The Independent" nəşrinə müsahibəsində bildirib.

"Hazırda aktiv bilet bron prosesi gedir. Tariflər ötən illə müqayisədə bir qədər yüksəkdir, lakin hələlik tutumun yalnız təxminən 40%-i bron edilib. Düşünürəm ki, vəziyyət hələ də qeyri-sabitdir", deyə rəsmi bildirib.

Onun sözlərinə görə, planlar müəyyən risklər altındadır: "Əgər Ukraynada vəziyyət pisləşərsə, ABŞ prezidenti Donald Tramp Ağ Evdə hansısa səhvə yol verərsə və ya Avropa şəhərlərində terror aktları baş verərsə, hər şey dəyişə bilər".

Bununla belə, hazırda insanların aktiv şəkildə yay üçün biletlər bron etdiyini qeyd edən O'Liri qiymətlərin ötən illə müqayisədə artacağını proqnozlaşdırır: "Keçən il tariflər əvvəlki illə müqayisədə 8% aşağı idi. Bu il isə müəyyən dərəcədə itkilərimizi kompensasiya edəcəyimizi düşünürəm".

O'Liri həmçinin "Ryanair"in inkişaf planlarını bölüşərək bildirib ki, aviaşirkət 2034-cü ilə qədər 300 milyon sərnişinə çatmaq niyyətindədir: "Biz 200 milyon sərnişində dayanmayacağıq, 100 milyon sərnişində də dayanmadıq. Hədəfimiz böyükdür. Hələ "Boeing"dən 336 təyyarə gözləyirik və bu, 2034-cü ilə qədər 300 milyon sərnişin hədəfinə çatmağımız üçün mühüm addımdır. Biz irəliləməyə davam edirik və dayanmaq fikrimiz yoxdur".

Bundan əlavə, "Ryanair" daimi sərnişinlər üçün eksklüziv endirim proqramını istifadəyə verib. Bu xidmət sərnişinlərə oturacaq seçimində və səyahət sığortasında üstünlüklər təqdim edəcək.

12 aylıq abunəliyin qiyməti 79 funt-sterlinq təşkil edir. Proqrama qoşulan sərnişinlər pulsuz yer seçimi, pulsuz səyahət sığortası və ildə 12 eksklüziv bilet endirimi kampaniyasından yararlanmaq imkanı əldə edəcəklər.

Paşa Məmmədli